സല്‍മാന്‍ ഖാനൊപ്പം ചുവടുവച്ച് മെഗാസ്റ്റാര്‍; ദൃശ്യവിരുന്ന് ഉറപ്പെന്ന് താരം
എന്റര്‍ടെയിന്‍മെന്റ് ഡെസ്‌ക്
Saturday, 30th July 2022, 9:52 am
പൃഥ്വിരാജിന്റെ സംവിധാനത്തില്‍ മോഹന്‍ലാല്‍ നായകനായി 2019 പുറത്തുവന്ന ഹിറ്റ് ചിത്രം ലൂസിഫറിന്റെ തെലുങ്ക് റീമേക്ക് ഗോഡ് ഫാദറിന്റെ ഷൂട്ടിങ് പുരോഗമിക്കുകയാണ്. ചിരഞ്ജീവി നായകനായി എത്തുന്ന ചിത്രത്തില്‍ സല്‍മാന്‍ ഖാനും അതിഥി വേഷത്തില്‍ എത്തുന്നുണ്ട്.
ചിത്രത്തില്‍ സല്‍മാന്‍ ഖാനൊപ്പം ഡാന്‍സ് ചെയ്യുന്നതിന്റെ സന്തോഷം പങ്കുവെച്ചിരിക്കുകയാണ് മെഗാസ്റ്റാര്‍ ചിരഞ്ജീവിയിപ്പോള്‍. ട്വിറ്ററിലാണ് അദ്ദേഹം ഗാന രംഗത്തിന്റെ സെറ്റില്‍ നിന്നുള്ള ചിത്രം പങ്കുവെച്ചിരിക്കുന്നത്.
ഗോഡ്ഫാദറിന് വേണ്ടി ഭായിക്കൊപ്പം ചുവടുവെക്കുന്നു, ഒന്നാംതരം ദൃശ്യ വിരുന്ന് തന്നെയായിരിക്കും ഇതെന്നാണ് ചിരഞ്ജീവി ട്വീറ്റ് ചെയ്തത്. പ്രഭു ദേവയാണ് ചിത്രത്തിന്റെ
കൊറിയോഗ്രാഫി നിര്‍വഹിക്കുന്നത്. തമന്‍ സംഗീത സംവിധാനം നിര്‍വഹിക്കുന്ന ചിത്രം സംവിധാനം ചെയ്യുന്നത് മോഹന്‍രാജയാണ്.
