ചൈനീസ് കമ്യൂണിസ്റ്റ് പാര്‍ട്ടിയുടെ അഴിമതിക്കെതിരായ കമ്മീഷനെ ഷി ചിന്‍പിങ് ഉപയോഗിക്കുന്നത് രാഷ്ട്രീയ എതിരാളികള്‍ക്കെതിരെ; റിപ്പോര്‍ട്ട്
ഡൂള്‍ന്യൂസ് ഡെസ്‌ക്
Monday, 14th March 2022, 6:43 pm
ബീജിങ്: ചൈനീസ് കമ്യൂണിസ്റ്റ് പാര്‍ട്ടിയുടെ (സി.സി.പി) പൊളിറ്റിക്കല്‍ ടൂള്‍ ആയ സെന്‍ട്രല്‍ കമ്മീഷന്‍ ഫോര്‍ ഡിസിപ്ലിന്‍ ഇന്‍സ്‌പെക്ഷനെ (സി.സി.ഡി.ഐ) തന്റെ രാഷ്ട്രീയ എതിരാളികള്‍ക്കെതിരായി പ്രയോഗിച്ചുകൊണ്ട് പ്രസിഡന്റ് ഷി ചിന്‍പിങ് ദുരുപയോഗം ചെയ്യുന്നതായി റിപ്പോര്‍ട്ട്.
അഴിമതി സംബന്ധമായ പരിശോധനകള്‍ക്ക് വേണ്ടിയായിരുന്നു സി.സി.ഡി.ഐക്ക് രൂപം നല്‍കിയത്. എന്നാല്‍ ഇത് രാഷ്ട്രീയ പകപോക്കലിനായി ഷി ചിന്‍പിങ് ഉപയോഗിക്കുകയാണെന്നാണ് റിപ്പോര്‍ട്ടില്‍ പറയുന്നത്.
അഴിമതിവിരുദ്ധ പ്രവര്‍ത്തനം എന്ന മുഖ്യ ഉദ്ദേശത്തില്‍ നിന്നും ‘പെരുമാറ്റ പരിഷ്‌കരണം’, ‘ഉദ്യോഗസ്ഥഭരണത്തിന്റെ കാര്യപ്രാപ്തിയില്ലായ്മ’ എന്നിവയിലേക്ക് സി.സി.ഡി.ഐയുടെ പ്രവര്‍ത്തനം ശ്രദ്ധ കേന്ദ്രീകരിച്ചു എന്നാണ് എ.എന്‍.ഐയുടെ റിപ്പോര്‍ട്ടില്‍ പറയുന്നത്.
