'ചൈനയില്‍ കൊറോണ വൈറസാണെങ്കില്‍ കശ്മീരിലെ വൈറസ് പൊതുസുരക്ഷാ നിയമമാണ്'; കേന്ദ്രത്തെ പരിഹസിച്ച് പി.ഡി.പി നേതാവ്
ഡൂള്‍ന്യൂസ് ഡെസ്‌ക്
Friday, 14th February 2020, 8:14 am
ന്യൂദല്‍ഹി: പൊതുസുരക്ഷാ നിയമത്തെ (പി.എസ്.എ) കൊറോണാ വയറസിനോട് താരതമ്യം ചെയ്ത് പി.ഡി.പി നേതാവും രാജ്യസഭാ എം.പിയുമായ ഫയസ് അഹമ്മദ് മിര്‍.
” ഈ രാജ്യത്ത് ഒരു ജനാധിപത്യം ഉണ്ട്, പക്ഷേ എന്തെങ്കിലും പറഞ്ഞാല്‍ പി.എസ്.എ ചുമത്തിക്കളയും. ചൈനയില്‍ കൊറോണയാണെങ്കില്‍ ഇവിടെ ഇതാണ്. അതുകൊണ്ടാണ് ആളുകള്‍ക്ക് കശ്മീരിലെ അവസ്ഥയെക്കുറിച്ച് സംസാരിക്കാനിത്ര ഭയം. പി.എസ്.എ നിയമം ചുമത്തി അറസ്റ്റ് ചെയ്തുകളഞ്ഞേക്കുമോ എന്ന ഭയമാണവര്‍ക്ക്,” മിര്‍ എ.എന്‍.ഐ യോട് പറഞ്ഞു.
പാര്‍ലമെന്റിലെ അംഗമായിരുന്നിട്ട് കൂടി തനിക്ക് പൊതുസുരക്ഷാ നിയമത്തെക്കുറിച്ച് സംസാരിക്കാന്‍ ഭയമാണെന്നും അദ്ദേഹം പറഞ്ഞു.
”പാര്‍ലമെന്റിലെ അംഗമായിരിന്നിട്ട് കൂടി എനിക്ക് പി.എസ്.എക്കുറിച്ച് പറയാന്‍ പേടിയാണ്. പൊലീസ് വന്ന് അറസ്റ്റ് ചെയ്യില്ലാ എന്ന് ആര്‍ക്കറിയാം,” മിര്‍ പറഞ്ഞു.
