പെന്റഗണ്‍ ഹാക്ക് ചെയ്യപ്പെട്ടോ? അതോ പുതിയ ആണവായുധ കോഡോ; തലപുകച്ച ട്വീറ്റിന് പിന്നാലെ വിശദീകരണം നല്‍കി അമേരിക്ക
ഡൂള്‍ന്യൂസ് ഡെസ്‌ക്
Wednesday, 31st March 2021, 12:06 am
വാഷിംഗ്ടണ്‍: അമേരിക്കന്‍ പ്രതിരോധ വിഭാഗത്തിന്റെ പ്രധാന വകുപ്പുകളിലൊന്നായ സ്ട്രാറ്റജിക് കമാന്റിന്റെ ഔദ്യോഗിക ട്വിറ്റര്‍ ഹാന്‍ഡിലില്‍ നിന്നും വന്ന ഒരു ട്വീറ്റ് ഏറെ സംശയങ്ങള്‍ക്കും ഊഹാപോഹങ്ങള്‍ക്കും വഴിവെച്ചിരുന്നു. ;l;;gmlxzssaw എന്നായിരുന്നു ഈ ട്വീറ്റ്.
ഇത് യു.എസിന്റെ പുതിയ ആണവായുധ കോഡാണെന്നും ലോഞ്ചിംഗിന് ഉപയോഗിക്കുന്നതാണെന്നുമായിരുന്നു വന്ന വാദങ്ങളിലൊന്ന്. അമേരിക്കയുടെ മിലിട്ടറി ആസ്ഥാനമായ പെന്റഗണ്‍ ഹാക്ക് ചെയ്യപ്പെട്ടവെന്നതായിരുന്നു ഉയര്‍ന്ന മറ്റൊരു ആശങ്ക.
എന്നാല്‍ ട്വീറ്റില്‍ ആശങ്കപ്പെടേണ്ടതൊന്നുമില്ലെന്ന വിശദീകരണവുമായി എത്തിയിരിക്കുകയാണ് സ്ട്രാറ്റജിക് കമാന്റ്. വകുപ്പിന്റെ സോഷ്യല്‍ മീഡിയ എഡിറ്റര്‍ വീട്ടില്‍ നിന്നുമാണ് ജോലി ചെയ്തിരുന്നതെന്നും അപ്പോള്‍ ഒരു കുട്ടി അറിയാതെ ചെയ്തുപോയ ട്വീറ്റാണ് ഇതെന്നുമാണ് വകുപ്പ് മാധ്യമങ്ങളെ അറിയിച്ചത്.
