ഛത്തീസ്ഗഢില്‍ ടാറ്റയ്ക്ക് കൊടുത്ത കൃഷിഭൂമി ആദിവാസികള്‍ക്ക് തിരിച്ചു നല്‍കാന്‍ കോണ്‍ഗ്രസ്
ഡൂള്‍ന്യൂസ് ഡെസ്‌ക്
Monday, 24th December 2018, 10:48 pm
റായ്പൂര്‍: തെരഞ്ഞെടുപ്പ് വാഗ്ദാനം നിറവേറ്റുന്നതിന്റെ ഭാഗമായി ആദിവാസികളില്‍ നിന്നും ഏറ്റെടുത്ത കൃഷി ഭൂമി തിരിച്ചുകൊടുക്കാനുള്ള തീരുമാനവുമായി പുതിയ കോണ്‍ഗ്രസ് സര്‍ക്കാര്‍. ബസ്തറിലെ ലോഹന്ദിഗുദയില്‍ 2005ല്‍ ഏറ്റെടുത്ത ഭൂമിയാണ് തിരിച്ചുകൊടുക്കുന്നത്.
നവംബര്‍ 10ന് ജഗ്ദാല്‍പൂരില്‍ നടന്ന പ്രചരണ പരിപാടിയില്‍ ഭൂമി തിരിച്ചുകൊടുക്കുമെന്ന് രാഹുല്‍ഗാന്ധി വാഗ്ദാനം ചെയ്തിരുന്നു. വ്യാവസായിക ആവശ്യങ്ങള്‍ക്കായി ഏറ്റെടുത്ത കൃഷിഭൂമിയില്‍ അഞ്ച് വര്‍ഷത്തിനുള്ളില്‍ പണി തുടങ്ങിയില്ലെങ്കില്‍ കര്‍ഷകര്‍ക്ക് തിരിച്ചുകൊടുക്കുമെന്നത് കോണ്‍ഗ്രസിന്റെ തെരഞ്ഞെടുപ്പ് വാഗ്ദാനമായിരുന്നു.
ക്യാബിനറ്റ് തീരുമാനം വരുന്ന മുറയ്ക്ക് ഭൂമി തിരികെ കൊടുക്കുന്ന നടപടിക്രമങ്ങള്‍ തുടങ്ങാന്‍ മുഖ്യമന്ത്രി ഭൂപേഷ് ബാഗേല്‍ ഓഫീസര്‍മാര്‍ക്ക് നിര്‍ദ്ദേശം നല്‍കിയിട്ടുണ്ട്.
