ധോണിയല്ലാതെ വേറെ ആര്? മെഗാ ലേലത്തില്‍ ഒരാളെയെങ്കിലും നിലനിര്‍ത്താന്‍ പറ്റിയാല്‍ അത് ധോണിയെ ആയിരിക്കുമെന്ന് ചെന്നൈ സൂപ്പര്‍കിംഗ്‌സ്
സ്പോര്ട്സ് ഡെസ്‌ക്
Sunday, 17th October 2021, 12:19 pm
ചെന്നൈ: 2022ലെ ഐ.പി.എല്‍ മെഗാ താരലേലത്തില്‍ മഹേന്ദ്രസിംഗ് ധോണിയെ നിലനിര്‍ത്തുമെന്ന് ചെന്നൈ സൂപ്പര്‍കിംഗ്‌സ്. മാനേജ്‌മെന്റ് വൃത്തങ്ങളെ ഉദ്ധരിച്ച് സ്പോര്ട്സ് ടോക്കാണ് ഇക്കാര്യം റിപ്പോര്‍ട്ട് ചെയ്യുന്നത്.
മെഗാ ലേലത്തിന്റെ ചട്ടങ്ങള്‍ ഇനിയും തീരുമാനിച്ചിട്ടില്ല. ഫ്രാഞ്ചൈസികള്‍ക്ക് ഏതെങ്കിലും താരത്തെ നിലനിര്‍ത്താമെന്ന ഓപ്ഷന്‍ ഉണ്ടെങ്കില്‍ തങ്ങള്‍ ധോണിയെ നിലനിര്‍ത്തുമെന്ന് സി.എസ്.കെ വൃത്തങ്ങള്‍ പറയുന്നു.
‘ധോണിയായിരിക്കും ഞങ്ങള്‍ നിലനിര്‍ത്തുന്ന താരം. അതില്‍ ഒരു സംശയവുമില്ല. എല്ലാത്തിലുമുപരി ബി.സി.സി.ഐയുടെ തീരുമാനമെന്താണെന്നറിയണം. ലേലത്തിന്റെ ചട്ടങ്ങളെക്കുറിച്ച് ഇപ്പോഴും ഒരു ധാരണയുമില്ല,’ ചെന്നൈ അധികൃതര്‍ പറഞ്ഞു.
ഈ സീസണില്‍ ധോണിയുടെ കീഴില്‍ ചെന്നൈ കിരീടം നേടിയിരുന്നു. ഐ.പി.എല്ലില്‍ ധോണിയുടെ നായകത്വത്തിന് കീഴില്‍ നാല് തവണയാണ് ചെന്നൈ കിരീടം നേടിയത്.
