ന്യൂദല്‍ഹി: ഇന്ത്യ-പാകിസ്താന്‍ ക്രിക്കറ്റ് മത്സരത്തിന് കേന്ദ്രത്തിന്റെ ചുവപ്പു കൊടി. അതിര്‍ത്തി കടന്നുള്ള ഭീകരാക്രമണം അവസാനിക്കാത്ത സാഹചര്യത്തിലാണ് പാകിസ്താനുമായുള്ള ക്രിക്കറ്റ് മത്സരം വേണ്ടെന്നു വയ്ക്കാന്‍ കേന്ദ്ര ആഭ്യന്തര മന്ത്രാലയം തീരുമാനിച്ചത്.
ദുബായില്‍ മത്സരം നടത്താന്‍ അനുവദിക്കണമെന്നാവശ്യപ്പെട്ടു കൊണ്ട് ബി.സി.സി.ഐ കേന്ദ്രത്തെ സമീപിച്ചിരുന്നു. എന്നാല്‍ ഈ ആവശ്യം കേന്ദ്രം തള്ളുകയായിരുന്നു. തുടര്‍ച്ചയായി ഉണ്ടായ ഭീകരാക്രമണങ്ങളുടേയും ഇന്ത്യ-പാക് നയതന്ത്ര ബന്ധം വഷളായി കൊണ്ടിരിക്കുകയും ചെയ്യുന്ന സാഹചര്യത്തിലാണ് കേന്ദ്രത്തിന്റെ തീരുമാനം.
2008 മുംബൈ ഭീകരാക്രമണത്തിന് ശേഷം ഇന്ത്യയും പാകിസ്താനും തമ്മില്‍ പരമ്പര നടത്തിയിട്ടില്ല. പുനരാരംഭിക്കാന്‍ പലവട്ടം ശ്രമിച്ചെങ്കിലും നടന്നില്ല. ഇതിനിടെ വീണ്ടും ആക്രമണങ്ങളുമുണ്ടായി.
നിലവില്‍ പാകിസ്താന്റെ ഹോം ഗ്രൗണ്ട് ഷാര്‍ജയാണ്. 2016 ലെ ട്വന്റി-20 ലോകകപ്പിലാണ് ഇന്ത്യയും പാകിസ്താനും അവസാനം ഏറ്റുമുട്ടിയത്. ക്രിക്കറ്റില്‍ ഏറ്റവും അധികം ആളുകള്‍ കാണുന്നതും ആവേശം നിറഞ്ഞതുമായ പോരാട്ടമാണ് ഇന്ത്യ-പാകിസ്താന്‍ മത്സരങ്ങള്‍.