പറയുന്നതിന്റെ അപ്പുറത്ത് മറ്റൊന്നും ചെയ്യാന്‍ പൃഥ്വിരാജ് സമ്മതിക്കില്ല, മോഹന്‍ലാലിന് പോലും പറ്റിയിട്ടുണ്ടാവില്ല; ലൂസിഫര്‍ സെറ്റിലെ പൃഥ്വിരാജിനെക്കുറിച്ച് ബൈജു
എന്റര്‍ടെയിന്‍മെന്റ് ഡെസ്‌ക്
Sunday, 27th June 2021, 10:54 am
പൃഥ്വിരാജ് ആദ്യമായി സംവിധാനം ചെയ്ത ചിത്രമാണ് ലൂസിഫര്‍. പൃഥ്വിരാജ് എന്ന സംവിധായകനെക്കുറിച്ച് തുറന്നു പറയുകയാണ് നടന്‍ ബൈജു. മാധ്യമപ്രവര്‍ത്തകന്‍ ലല്ലുവിന് നല്‍കിയ അഭിമുഖത്തിലാണ് ബൈജു അനുഭവം പങ്കുവെക്കുന്നത്.
പൃഥ്വിരാജ് പറയുന്നതല്ലാതെ മറ്റൊന്നും കയ്യില്‍ നിന്ന് ഇട്ട് ചെയ്യാന്‍ അവന്‍ സമ്മതിച്ചിട്ടുണ്ടായിരുന്നില്ലെന്ന് ബൈജു പറയുന്നു.
‘ഒരു സംഭവവും കയ്യില്‍ നിന്ന് ഇട്ട് ചെയ്യാന്‍ രാജു സമ്മതിക്കില്ല. ചേട്ടാ അതു വേണ്ട എന്ന് പറയും. ഞാന്‍ ചെറുപ്പത്തില്‍ കണ്ട പൃഥ്വിരാജ് അല്ല ഇപ്പോള്‍. ചേട്ടാ അതു വേണ്ട എന്നു പറഞ്ഞാല്‍ പിന്നെ നമുക്കൊന്നും തിരിച്ച് ചോദിക്കാന്‍ കഴിയില്ല. ഒരു ഡയറക്ടര്‍ എന്ന നിലയില്‍ അങ്ങനെയാണ് പൃഥ്വി നിന്നിരുന്നത്. ലാലേട്ടന് പോലും കയ്യില്‍ നിന്നിട്ട് എന്തെങ്കിലും ചെയ്യാന്‍ പറ്റിയിട്ടുണ്ടാവുമെന്ന് എനിക്ക് തോന്നുന്നില്ല,’ ബൈജു പറഞ്ഞു.
