2023ലെ ബില്‍ബോര്‍ഡ് മ്യൂസിക് അവാര്‍ഡുകള്‍ക്കുള്ള (BBMA) ഫൈനലിസ്റ്റുകളുടെ ലിസ്റ്റ് ബില്‍ബോര്‍ഡ് പുറത്തിറക്കി. ലിസ്റ്റില്‍ ഏറ്റവും കൂടുതല്‍ അവാര്‍ഡ് നോമിനേഷനില്‍ വന്നിരിക്കുന്നത് ടെയ്ലര്‍ സ്വിഫ്റ്റാണ്. ടോപ്പ് ആര്‍ട്ടിസ്റ്റ്, ടോപ്പ് ഫീമെയില്‍ ആര്‍ട്ടിസ്റ്റ്, ടോപ്പ് കണ്‍ട്രി ആര്‍ട്ടിസ്റ്റ് എന്നിവ ഉള്‍പ്പെടെ ഈ വര്‍ഷം 20 അവാര്‍ഡ് നോമിനേഷനുകളിലാണ് സ്വിഫ്റ്റ് ഉള്ളത്.
ഇതുവരെ ഏറ്റവും കൂടുതല്‍ ബില്‍ബോര്‍ഡ് മ്യൂസിക് അവാര്‍ഡുകള്‍ നേടിയിരിക്കുന്നത് കനേഡിയന്‍ റാപ്പറും സിങ്ങറുമായ ഓബ്രി ഡ്രേക്ക് ഗ്രഹാം എന്ന ഡ്രേക്ക് ആണ്. അദ്ദേഹം ഇതുവരെ നേടിയിരിക്കുന്നത് 34 അവാര്‍ഡുകളാണ്. ഈ വര്‍ഷം അവാര്‍ഡുകള്‍ക്കുള്ള ഫൈനലിസ്റ്റുകളുടെ ലിസ്റ്റില്‍ 14 അവാര്‍ഡ് നോമിനേഷനുകളില്‍ അദ്ദേഹത്തിന്റെ പേരുണ്ട്.
ഒരു ഗ്രൂപ്പ് നേടിയ ഏറ്റവും കൂടുതല്‍ ബില്‍ബോര്‍ഡ് മ്യൂസിക് അവാര്‍ഡുകളുടെ റെക്കോഡ് 12 അവാര്‍ഡുകള്‍ നേടിയ ബി.ടി.എസിന്റെ പേരിലാണ്. ഇത്തവണത്തെ ബില്‍ബോര്‍ഡ് മ്യൂസിക് അവാര്‍ഡിന്റെ ഫൈനലിസ്റ്റുകളുടെ ലിസ്റ്റില്‍ ബി.ടി.എസ് ജിമിനിന്റെ പേര് നാല് വിഭാഗങ്ങളില്‍ വന്നിട്ടുണ്ട്. ടോപ്പ് സെല്ലിങ്ങ് സോങ്ങ് വിഭാഗത്തില്‍ നോമിനേഷനില്‍ വരുന്ന ആദ്യത്തെ കെ-പോപ്പ് സോളോ ആര്‍ട്ടിസ്റ്റായി ജിമിന്‍ മാറി. ബി.ടി.എസ് ജങ്കൂക്കിന്റെ ‘സെവന്‍’ ടോപ്പ് ഗ്ലോബല്‍ കെ-പോപ്പ് സോങ്ങിന്റെ വിഭാഗത്തിലേക്ക് നോമിനേറ്റ് ചെയ്യപ്പെട്ടിട്ടുണ്ട്.
ഈ വര്‍ഷം ഒന്‍പത് പുതിയ അവാര്‍ഡ് വിഭാഗങ്ങളും ബില്‍ബോര്‍ഡ് ഉള്‍പ്പെടുത്തിയിട്ടുണ്ട്. ടോപ്പ് ഹോട്ട് 100 സോങ്ങ് റൈറ്റര്‍, ടോപ്പ് ഹോട്ട് 100 പ്രൊഡ്യൂസര്‍, ടോപ്പ് റോക്ക് ഡ്യുവോ/ഗ്രൂപ്പ്, ടോപ്പ് ഗ്ലോബല്‍ കെ-പോപ്പ് ആര്‍ട്ടിസ്റ്റ്, ടോപ്പ് ഗ്ലോബല്‍ കെ-പോപ്പ് ടൂര്‍, ടോപ്പ് കെ-പോപ്പ് ആല്‍ബം, ടോപ്പ് ഗ്ലോബല്‍ കെ-പോപ്പ് സോങ്ങ്, ടോപ്പ് ആഫ്രോബീറ്റ് ആര്‍ട്ടിസ്റ്റ്, ടോപ്പ് ആഫ്രോബീറ്റ് സോങ്ങ് എന്നിവയൊക്കെയാണവ.
മറ്റ് മ്യൂസിക് അവാര്‍ഡുകളില്‍ നിന്ന് വ്യത്യസ്തമായി ആല്‍ബം, ഡിജിറ്റല്‍ സോങ്ങുകളുടെ വില്‍പ്പന, സ്ട്രീമിംഗ്, റേഡിയോ എയര്‍പ്ലേ എന്നിവയെ അടിസ്ഥാനമാക്കിയാണ് ബില്‍ബോര്‍ഡ് മ്യൂസിക് അവാര്‍ഡിലെ ഫൈനലിസ്റ്റുകളെ തെരഞ്ഞെടുക്കുന്നത്. വിവിധ മ്യൂസിക് വിഭാഗങ്ങളിലെ മികച്ച ആല്‍ബത്തിനും ആര്‍ട്ടിസ്റ്റിനും സിംഗിളിനുമാണ് അവാര്‍ഡുകള്‍ നല്‍കുന്നത്.
2023ലെ ബില്‍ബോര്‍ഡ് മ്യൂസിക് അവാര്‍ഡുകള്‍ നവംബര്‍ 19നാണ് നടക്കുന്നത്. ബി.ബി.എം.എയുടെയും ബില്‍ബോര്‍ഡിന്റെയും സോഷ്യല്‍ മീഡിയ ചാനലുകളിലൂടെ അവാര്‍ഡ് വിതരണം പോപ്പ് ആരാധകര്‍ക്ക് കാണാന്‍ സാധിക്കും. ആരൊക്കെയാവും ഇത്തവണത്തെ വിജയികളെന്നറിയാന്‍ ആകാംക്ഷയോടെ കാത്തിരിക്കുകയാണ് പോപ്പ് ആരാധകര്‍.
Content Highlight: Bts And Taylor Swift On Billboard Music Award 2023 Finalist List