2023ലെ ബില്‍ബോര്‍ഡ് മ്യൂസിക് അവാര്‍ഡുകള്‍ക്കുള്ള (BBMA) ഫൈനലിസ്റ്റുകളുടെ ലിസ്റ്റ് ബില്‍ബോര്‍ഡ് പുറത്തിറക്കി. ലിസ്റ്റില്‍ ഏറ്റവും കൂടുതല്‍ അവാര്‍ഡ് നോമിനേഷനില്‍ വന്നിരിക്കുന്നത് ടെയ്ലര്‍ സ്വിഫ്റ്റാണ്. ടോപ്പ് ആര്‍ട്ടിസ്റ്റ്, ടോപ്പ് ഫീമെയില്‍ ആര്‍ട്ടിസ്റ്റ്, ടോപ്പ് കണ്‍ട്രി ആര്‍ട്ടിസ്റ്റ് എന്നിവ ഉള്‍പ്പെടെ ഈ വര്‍ഷം 20 അവാര്‍ഡ് നോമിനേഷനുകളിലാണ് സ്വിഫ്റ്റ് ഉള്ളത്.
ഈ വര്‍ഷം സ്വിഫ്റ്റിന് ബി.ബി.എം.എ റെക്കോഡുകള്‍ തകര്‍ക്കാന്‍ കഴിയുമെന്നാണ് ബില്‍ബോര്‍ഡ് റിപ്പോര്‍ട്ട് ചെയ്യുന്നത്. മറ്റേതൊരു ഫീമെയില്‍ ആര്‍ട്ടിസ്റ്റിനേക്കാളും കൂടുതല്‍ ബി.ബി.എം.എ അവാര്‍ഡുകള്‍ സ്വിഫ്റ്റ് ഇതിനകം നേടിയിട്ടുണ്ട്. ഏറ്റവും കൂടുതല്‍ ബില്‍ബോര്‍ഡ് മ്യൂസിക് അവാര്‍ഡുകള്‍ നേടിയ ഫീമെയില്‍ ആര്‍ട്ടിസ്റ്റ് എന്ന റെക്കോഡ് 29 അവാര്‍ഡുകള്‍ നേടിയ ടെയ്ലര്‍ സ്വിഫ്റ്റിന്റെ പേരിലാണ്. എങ്കിലും ബി.ബി.എം.എയില്‍ ഏറ്റവും കൂടുതല്‍ അവാര്‍ഡ് നേടിയ ആര്‍ട്ടിസ്റ്റാവാന്‍ സ്വിഫ്റ്റിന് ഡ്രേക്കിനെ മറികടക്കണം.
ഇതുവരെ ഏറ്റവും കൂടുതല്‍ ബില്‍ബോര്‍ഡ് മ്യൂസിക് അവാര്‍ഡുകള്‍ നേടിയിരിക്കുന്നത് കനേഡിയന്‍ റാപ്പറും സിങ്ങറുമായ ഓബ്രി ഡ്രേക്ക് ഗ്രഹാം എന്ന ഡ്രേക്ക് ആണ്. അദ്ദേഹം ഇതുവരെ നേടിയിരിക്കുന്നത് 34 അവാര്‍ഡുകളാണ്. ഈ വര്‍ഷം അവാര്‍ഡുകള്‍ക്കുള്ള ഫൈനലിസ്റ്റുകളുടെ ലിസ്റ്റില്‍ 14 അവാര്‍ഡ് നോമിനേഷനുകളില്‍ അദ്ദേഹത്തിന്റെ പേരുണ്ട്.
2017ല്‍ ഡ്രേക്കിന് 13 അവാര്‍ഡുകളായിരുന്നു ലഭിച്ചിരുന്നത്. അതോടെ ഒരു വര്‍ഷം ഏറ്റവും കൂടുതല്‍ അവാര്‍ഡുകള്‍ നേടിയ ആര്‍ട്ടിസ്റ്റെന്ന റെക്കോഡ് അദ്ദേഹത്തിന് ലഭിച്ചിരുന്നു. ടെയ്ലര്‍ സ്വിഫ്റ്റിന് ഇത്തവണ ആ റെക്കോഡും മറികടക്കാനാകും എന്ന പ്രതീക്ഷയിലാണ് ആരാധകര്‍.
അതേസമയം, ബെയ്ലി സിമ്മര്‍മാന്‍, ഐസ് സ്പൈസ്, ജെല്ലി റോള്‍, പെസോ പ്ലൂമ, സാച്ച് ബ്രയാന്‍ എന്നിവരും ഈ വര്‍ഷത്തെ ടോപ്പ് ന്യൂ ആര്‍ട്ടിസ്റ്റ് നോമിനികളില്‍ ഉള്‍പ്പെടുന്നു. ഡ്രേക്ക്, ലൂക്ക് കോംബ്സ്, മോര്‍ഗന്‍ വാലന്‍, സാക്ക് ബ്രയാന്‍, ദി വീക്കെന്‍ഡ് എന്നിവര്‍ ടോപ്പ് മെയില്‍ ആര്‍ട്ടിസ്റ്റിനുള്ള മത്സരാര്‍ത്ഥികളില്‍ ഉള്‍പ്പെടുന്നു. ബിയോണ്‍സ്, മൈലി സൈറസ്, ഒലിവിയ റോഡ്രിഗോ, SZA, ടെയ്ലര്‍ സ്വിഫ്റ്റ് എന്നിവര്‍ അവസാന റൗണ്ടില്‍ ടോപ്പ് ഫീമെയില്‍ ആര്‍ട്ടിസ്റ്റ് പദവിക്കായി മത്സരിക്കുന്നുണ്ട്.
