ന്യൂദല്‍ഹി: പുതിയ നോട്ടുകളുടെ അച്ചടിക്കായി ബീഫ് കൊഴുപ്പ് (പശു കൊഴുപ്പ്) തന്നെ ഉപയോഗിക്കുമെന്ന് ഫെഡറല്‍ ബാങ്ക് ഓഫ് ഇംഗ്ലണ്ട്. ഇതുമായി ബന്ധപ്പെട്ട് ഹിന്ദു സംഘടനകളുടെ എതിര്‍പ്പ് കാര്യമാക്കുന്നില്ലെന്നും ഫെഡറല്‍ ബാങ്ക് വ്യക്തമാക്കിയതായി ജനതാ കാ റിപ്പോര്‍ട്ടര്‍ റിപ്പോര്‍ട്ട് ചെയ്യുന്നു.
പുതിയ പോളിമര്‍ നോട്ടുകളുടെ നിര്‍മാണത്തിനാണ് പശുക്കൊഴുപ്പ് ഉപയോഗിക്കുന്നത്. ഇതിനെതിരെ ചില ബ്രാഹ്മണ, ഹൈന്ദവ സംഘടനകള്‍ രംഗത്തെത്തിയിരുന്നു. യു.കെയിലെ ചില ക്ഷേത്രങ്ങളില്‍ മൃഗക്കൊഴുപ്പ് ഉപയോഗിച്ച് നിര്‍മിച്ച നോട്ടുകള്‍ സ്വീകരിക്കുന്നില്ലെന്ന പരാതിയും ഇതിനിടെ ഉയര്‍ന്നിരുന്നു.
ഹിന്ദു സംഘടനകള്‍ ഉള്‍പ്പെടെ ഇതിനെതിരെ പ്രതിഷേധവുമായി രംഗത്തെത്തിയതോടെ വിഷയത്തില്‍ മന്ത്രാലയം പൊതുചര്‍ച്ചയ്ക്ക് തയ്യാറായിരുന്നു. എന്നാല്‍ പോളിമര്‍ നോട്ട് നിര്‍മാണത്തില്‍ പാംഓയിലിനെ ആശ്രയിക്കുന്നത് കൂടുതല്‍ ചിലവേറിയതാണെന്ന നിഗമനത്തിലായിരുന്നു അതോറിറ്റി.
മാത്രമല്ല പരിസ്ഥിതി സുസ്ഥിരതയും ലഭ്യതയും എല്ലാം കണക്കിലെടുക്കുമ്പോള്‍ പാം ഓയിലിനെ മാത്രം ആശ്രയിക്കാന്‍ കഴിയില്ലെന്നും ബാങ്ക് വ്യക്തമാക്കുന്നു. പണത്തിന്റെ മൂല്യം കൂടി പരിഗണിച്ചാണ് ഇത്തരമൊരു തീരുമാനമെന്നും ബാങ്ക് പ്രസ്താവനയില്‍ പറഞ്ഞു.
അടുത്ത പത്തുവര്‍ഷത്തിനുള്ളി്ല്‍ പുതിയതരം ഉത്പാദനത്തിലേക്ക് മാറാനുള്ള ചിലവ് ഏതാണ്ട് 16.5 ദശലക്ഷമാണ് കണക്കാക്കുന്നതെന്നും ബാങ്ക് ഓഫ് ഇംഗ്ലണ്ട് വ്യക്തമാക്കുന്നു.
5 പൗണ്ടിന്റേയും 10 പൗണ്ടിന്റേയും പോളിമര്‍ നോട്ടുകളുടെ ഉത്പാദനമാണ് ഈ വര്‍ഷം നടത്താന്‍ ഉദ്ദേശിക്കുന്നത്. അതേസമയം 3554 ഓളം വരുന്ന ആളുമായി നടത്തിയ ചര്‍ച്ചയില്‍ മൃഗക്കൊഴുപ്പ് ഉപയോഗിച്ചുള്ള ഉത്പാദനത്തെ 88 ശതമാനം പേര്‍ എതിര്‍ത്തപ്പോള്‍ പാം ഓയില്‍ ഉപയോഗിച്ചുള്ള ഉത്പാദനത്തെ 48 ശതമാനം ആളുകളും എതിര്‍ത്തെന്നും ബാങ്ക് വ്യക്തമാക്കുന്നു. എന്നാല്‍ ഉത്പാദന ചിലവുകൂടി കണക്കാക്കിക്കൊണ്ടാണ് തീരുമാനമെന്നും ബാങ്ക് അതോറിറ്റി വ്യക്തമാക്കുന്നു.
30 ഓളം രാജ്യങ്ങളില്‍ ഇപ്പോഴും പോളിമര്‍ നോട്ടുകള്‍ തന്നെയാണ് ഉപയോഗിക്കുന്നത്. മാത്രമല്ല ഡെബിറ്റ്, ക്രെഡിറ്റ് കാര്‍ഡുകള്‍, മൊബൈല്‍ ഫോണുകള്‍, സൗന്ദര്യവര്‍ദ്ധകവസ്തുക്കള്‍, സോപ്പുകള്‍, ഗാര്‍ഹിക ഡിറ്റര്‍ജന്റ് ബോട്ടിലുകള്‍ എന്നിവയിലും മൃഗക്കൊഴുപ്പുകള്‍ ഉപയോഗിക്കുന്നുണ്ടെന്നും അതോറിറ്റി വ്യക്തമാക്കുന്നു.