ബോര്‍ഡര്‍ – ഗവാസ്‌കര്‍ ട്രോഫിക്കുള്ള മുന്നൊരുക്കത്തിലാണ് ഇന്ത്യന്‍ ടീം. ഇത്തവണ എതിരാളികളുടെ തട്ടകത്തിലാണ് പരമ്പര അരങ്ങേറുന്നത്. പരമ്പര വിജയത്തേക്കാളുപരി വേള്‍ഡ് ടെസ്റ്റ് ചാമ്പ്യന്‍ഷിപ്പിന്റെ ഫൈനലാണ് ഇന്ത്യയും ഓസ്‌ട്രേലിയയും ലക്ഷ്യമിടുന്നത്.
നവംബര്‍ 22നാണ് പരമ്പര ആരംഭിക്കുന്നത്. പെര്‍ത്തിലെ ഒപ്റ്റസ് സ്റ്റേഡിയമാണ് ആദ്യ മത്സരത്തിന് വേദിയാകുന്നത്.
ഈ മത്സരത്തില്‍ നായകന്‍ രോഹിത് ശര്‍മ കളിക്കാന്‍ സാധ്യതയില്ലെന്ന് റിപ്പോര്‍ട്ടുകളുണ്ടായിരുന്നു. വ്യക്തിപരമായ കാരണങ്ങളാലാണ് രോഹിത് ആദ്യ മത്സരത്തില്‍ നിന്നും വിട്ടുനില്‍ക്കുന്നത് എന്നായിരുന്നു റിപ്പോര്‍ട്ട്. ഇതിന് പിന്നാലെ സുനില്‍ ഗവാസ്‌കര്‍ അടക്കമുള്ളവര്‍ നടത്തിയ ചില പ്രസ്താവനകള്‍ വിവാദമാവുകയും ചെയ്തിരുന്നു.
ആദ്യ മത്സരത്തില്‍ രോഹിത് ഉണ്ടാകുമോ എന്നതിനെ സംബന്ധിച്ച് സംസാരിക്കുകയാണ് പരിശീലകന്‍ ഗൗതം ഗംഭീര്‍.
‘നിലവില്‍ അതിനെ സംബന്ധിച്ച് ഒന്നും തന്നെ ഉറപ്പിച്ച് പറയാന്‍ സാധിക്കില്ല. സാഹചര്യങ്ങള്‍ എന്താണെന്ന് നിങ്ങളെ ഉറപ്പായും അറിയിക്കുന്നതാണ്. രോഹിത് ആദ്യ മത്സരത്തിനുണ്ടാകുമെന്നാണ് പ്രതീക്ഷിക്കുന്നത്,’ ഗംഭീര്‍ പറഞ്ഞു.
എന്നാല്‍ രോഹിത്തിന് ആദ്യ മത്സരം കളിക്കാന്‍ സാധിച്ചില്ലെങ്കില്‍ പകരം ആര് ഇന്ത്യയെ നയിക്കും എന്നതിനെ കുറിച്ചും ഗംഭീര്‍ സംസാരിച്ചു. അത്തരമൊരു സാഹചര്യമുണ്ടായാല്‍ ബുംറ ഇന്ത്യയെ നയിക്കുമെന്നാണ് ഗംഭീര്‍ പറഞ്ഞത്.
ഇതിന് മുമ്പ് പലപ്പോഴായി ഇന്ത്യയെ നിയിച്ചിട്ടുണ്ട്. ഇതില്‍ ഒരു ടെസ്റ്റ് മത്സരവും ഉള്‍പ്പെടുന്നു.
2022ല്‍ ഇന്ത്യയുടെ ഇംഗ്ലണ്ട് പര്യടനത്തിലെ അഞ്ചാം ടെസ്റ്റിലാണ് ബുംറ ക്യാപ്റ്റന്റെ കുപ്പായത്തിലെത്തിയത്. രോഹിത് ശര്‍മ കൊവിഡ് ബാധിതനായതിന് പിന്നാലെയാണ് ബുംറ ക്യാപ്റ്റന്‍സിയേറ്റെടുത്തത്. ബെര്‍മിങ്ഹാമിലെ എഡ്ജ്ബാസ്റ്റണായിരുന്നു ബുംറയുടെ ക്യാപ്റ്റനായുള്ള അരങ്ങേറ്റത്തിന് സാക്ഷ്യം വഹിച്ചത്.
ഇതിഹാസ താരം കപില്‍ ദേവിന് ശേഷം ഇന്ത്യയെ നയിക്കുന്ന ആദ്യ പേസര്‍ എന്ന ഐതിഹാസിക നേട്ടവും ബുംറ അന്ന് സ്വന്തമാക്കിയിരുന്നു.
എന്നാല്‍ ഈ മത്സരത്തില്‍ ഇന്ത്യയെ വിജയത്തിലേക്ക് നയിക്കാന്‍ മാത്രം ബുംറക്ക് സാധിച്ചില്ല. അഞ്ചാം ടെസ്റ്റില്‍ പരാജയപ്പെട്ടതോടെ പരമ്പര സമനിലയില്‍ അവസാനിക്കുകയും ചെയ്തു.
കാലങ്ങള്‍ക്ക് ശേഷം അഞ്ച് മത്സരങ്ങളുടെ പരമ്പരയിലേക്ക് ബി.ജി.ടി കളം മാറുകയാണ്. ബോര്‍ഡര്‍ – ഗവാസ്‌കര്‍ ട്രോഫിയിലെ തുടര്‍ച്ചയായ അഞ്ചാം വിജയവും ഓസ്ട്രേലിയന് മണ്ണിലെ തുടര്‍ച്ചയായ മൂന്നാം വിജയവുമാണ് ഇന്ത്യ ലക്ഷ്യമിടുന്നത്.
ആദ്യ ടെസ്റ്റ് – നവംബര്‍ 22 മുതല്‍ 26 വരെ – ഒപ്റ്റസ് സ്റ്റേഡിയം, പെര്‍ത്ത്.
രണ്ടാം ടെസ്റ്റ് – ഡിസംബര്‍ 6 മുതല്‍ 10 വരെ – അഡ്ലെയ്ഡ് ഓവല്‍.
മൂന്നാം ടെസ്റ്റ് – ഡിസംബര്‍ 14 മുതല്‍ 18 വരെ – ദി ഗാബ, ബ്രിസ്ബെയ്ന്‍.
ബോക്സിങ് ഡേ ടെസ്റ്റ് – ഡിസംബര്‍ 26 മുതല്‍ 30 വരെ – മെല്‍ബണ്‍ ക്രിക്കറ്റ് ഗ്രൗണ്ട്.
അവസാന ടെസ്റ്റ് – ജനുവരി 3 മുതല്‍ 7 വരെ – സിഡ്നി ക്രിക്കറ്റ് ഗ്രൗണ്ട്.
രോഹിത് ശര്‍മ (ക്യാപ്റ്റന്‍), ജസ്പ്രീത് ബുംറ (വൈസ് ക്യാപ്റ്റന്‍), യശസ്വി ജെയ്‌സ്വാള്‍, അഭിമന്യു ഈശ്വരന്‍, ശുഭ്മന്‍ ഗില്‍, വിരാട് കോഹ്‌ലി, കെ.എല്‍. രാഹുല്‍, റിഷബ് പന്ത് (വിക്കറ്റ് കീപ്പര്‍), ധ്രുവ് ജുറെല്‍ (വിക്കറ്റ് കീപ്പര്‍), സര്‍ഫറാസ് ഖാന്‍, ആര്. അശ്വിന്‍, രവീന്ദ്ര ജഡേജ, മുഹമ്മദ് സിറാജ്, ആകാശ് ദീപ്, പ്രസിദ്ധ് കൃഷ്ണ, ഹര്‍ഷിത് റാണ, നിതീഷ് കുമാര്‍ റെഡ്ഡി, വാഷിങ്ടണ്‍ സുന്ദര്‍.
ട്രാവലിങ് റിസര്‍വുകള്‍.
മുകേഷ് കുമാര്‍, നവ്ദീപ് സെയ്‌നി, ഖലീല്‍ അഹമ്മദ്.
പാറ്റ് കമ്മിന്‍സ് (ക്യാപ്റ്റന്‍), സ്റ്റീവ് സ്മിത്ത്, സ്‌കോട്ട് ബോളണ്ട്, അലക്സ് കാരി, ജോഷ് ഹേസല്‍വുഡ്, ട്രാവിസ് ഹെഡ്, ജോഷ് ഇംഗ്ലിസ്, ഉസ്മാന്‍ ഖവാജ, മാര്‍നസ് ലബുഷാന്‍, നഥാന്‍ ലിയോണ്‍, മിച്ചല്‍ മാര്‍ഷ്, നഥാന്‍ മക്‌സ്വീനി, മിച്ചല്‍ സ്റ്റാര്‍ക്ക്.
Content Highlight: Border-Gavaskar Trophy 2024: Gautam Gambhir says Jasprit Bumrah will be captain India in 1st test if Rohit Sharma is not available