ഇസ്‌ലാമാബാദ്: ഷാരൂഖ് ഖാന്റെ പിതൃസഹോദരന്റെ പുത്രി നൂര്‍ജഹാന്‍ പാകിസ്ഥാനില്‍ പൊതുതെരഞ്ഞെടുപ്പില്‍ മത്സരിക്കുന്നു. പാക് പത്രമായ എക്‌സ്പ്രസ് ട്രിബ്യൂണ്‍ ആണ് ഇക്കാര്യം റിപ്പോര്‍ട്ട് ചെയ്തത്. പി.കെ 77 മണ്ഡലത്തില്‍ നിന്ന് സ്വതന്ത്ര സ്ഥാനാര്‍ത്ഥിയായാണ് നൂര്‍ജഹാന്‍ മത്സരിക്കുക.
പാകിസ്ഥാനിലെ ഖതാലിലെ ഷാ വാലി മേഖലയിലാണ് നൂര്‍ജഹാനും കുടുംബവും താമസിക്കുന്നത്. ബന്ധുവെന്ന നിലയില്‍ ഷാരൂഖിന്റെ കുടുംബവുമായി അടുത്ത ബന്ധമാണ് നൂര്‍ജഹാനുള്ളതെന്നും നേരത്തെ രണ്ടു തവണ ഷാരൂഖിനെ കാണാനായി നൂര്‍ജെഹാന്‍ ഇന്ത്യയിലെത്തിയിട്ടുണ്ടെന്നും റിപ്പോര്‍ട്ട് പറയുന്നു.
നൂര്‍ജെഹാന്റെ സഹോദരനായ മന്‍സൂറാണ് സഹോദരിക്കായി തെരഞ്ഞെടുപ്പ് പ്രചാരണം നയിക്കുന്നത്. തങ്ങളുടെ കുടുംബം ഖാന്‍ അബ്ദുല്‍ ഖാഫര്‍ഖാന്റെ നേതൃത്വത്തിലുള്ള ഖുദായി ഖിദ്മത്ത്ഗര്‍ മൂവ്‌മെന്റുമായി ബന്ധപ്പെട്ട് പ്രവര്‍ത്തിച്ചിട്ടുണ്ടെന്ന് മന്‍സൂര്‍ എക്‌സ്പ്രസ് ട്രിബ്യൂണിനോട് പറഞ്ഞു.