ശ്രീനഗര്‍: ഹൈദര്‍പോറയിലുണ്ടായ ഏറ്റുമുട്ടലില്‍ കൊല്ലപ്പെട്ട വ്യവസായികളുടെ മൃതദേഹങ്ങള്‍ പ്രതിഷേധങ്ങള്‍ക്കൊടുവില്‍ പുറത്തെടുത്തു. മൃതദേഹങ്ങള്‍ ഇരുവരുടേയും വീട്ടുകാര്‍ക്ക് കൈമാറി. അന്ത്യകര്‍മങ്ങള്‍ക്ക് ശേഷം മൃതദേഹം സംസ്‌കരിച്ചു. സംഭവത്തില്‍ മജിസ്ട്രേറ്റ് തല അന്വേഷണത്തിന് ഉത്തരവിട്ടതിന് പിന്നാലെയാണിത്.
രാഷ്ട്രീയ പാര്‍ട്ടികളും ഇരുവരുടേയും കുടുംബങ്ങള്‍ക്ക് പിന്തുണയറിയിച്ച് എത്തിയതോടെ കൊലപാതകങ്ങളെക്കുറിച്ച് മജിസ്ട്രേറ്റ് തല അന്വേഷണത്തിന് ലെഫ്റ്റനന്റ് ഗവര്‍ണര്‍ മനോജ് സിന്‍ഹ ഉത്തരവിട്ടിരുന്നു. ശ്രീനഗര്‍ ഡെപ്യൂട്ടി കമ്മീഷണര്‍ മുഹമ്മദ് ഐജാസ് അസദ് അഡീഷണല്‍ ജില്ലാ മജിസ്‌ട്രേറ്റിനെയാണ് അന്വേഷണ ഉദ്യോഗസ്ഥനായി നിയമിച്ചത്.
തിങ്കളാഴ്ച ഹൈദര്‍പോറയിലെ വാണിജ്യ സമുച്ചയത്തില്‍ നടന്ന തീവ്രവാദ വിരുദ്ധ ഓപ്പറേഷനിലാണ് രണ്ട് വ്യവസായികള്‍ ഉള്‍പ്പെടെ നാല് പേര്‍ കൊല്ലപ്പെട്ടത്. വ്യവസായികളായ ഡോ. മുദാസിര്‍ ഗുല്‍, അല്‍താഫ് ഭട്ട് എന്നിവര്‍ തീവ്രവാദികളെ പിന്തുണച്ചവരാണെന്നായിരുന്നു പൊലീസിന്റെ വാദം.
ഇരുവരെയും ഭീകരര്‍ വെടിവെച്ചുകൊന്നതാണെന്ന് ആദ്യം പറഞ്ഞിരുന്നെങ്കിലും പിന്നീട് ഏറ്റുമുട്ടലില്‍ കൊല്ലപ്പെട്ടതാകാമെന്ന് പൊലീസ് പറഞ്ഞു.
എന്നാല്‍, ഇരുവരെയും സുരക്ഷാസേന തന്നെയാണ് കൊലപ്പെടുത്തിയതെന്ന് ആരോപിച്ച് വ്യവസായികളുടെ കുടുംബം രംഗത്ത് വന്നിരുന്നു.
അതേസമയം, അന്ത്യകര്‍മങ്ങള്‍ക്കായി ഇരുവരുടെയും മൃതദേഹങ്ങള്‍ വേണമെന്ന് വീട്ടുകാര്‍ ആവശ്യപ്പെട്ടിരുന്നെങ്കിലും ക്രമസമാധാന പ്രശ്നമുള്ളതിനാല്‍ മൃതദേഹം ബന്ധുക്കള്‍ക്ക് വിട്ടുനല്‍കാനാകില്ലെന്നായിരുന്നു സേന അറിയിച്ചിരുന്നത്.
ഇതിനെതുടര്‍ന്ന്, ഭരണകൂടത്തിനെതിരെ ശ്രീനഗറില്‍ പ്രതിഷേധം നടന്നിരുന്നു. ബന്ധുക്കള്‍ക്ക് മൃതദേഹങ്ങള്‍ വിട്ടുകൊടുക്കാത്തത് മനുഷ്യത്വത്തിനെതിരെയുള്ള കുറ്റകൃത്യമാണെന്ന് മുന്‍മുഖ്യമന്ത്രി ഒമര്‍ അബ്ദുള്ള പ്രതികരിച്ചിരുന്നു. മുന്‍മുഖ്യമന്ത്രി മെഹബൂബ മുഫ്തിയും സംഭവത്തിനെതിരെ രംഗത്ത് വന്നിരുന്നു.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം
Content Highlight: Bodies of two business men killed in Srinagar encounter exhumed and handed over to family