ടോക്കിയോ: കൊവിഡ് വ്യാപനം എത്രത്തോളം വേഗത്തില്‍ സംഭവിക്കുമെന്നും കൈകഴുകേണ്ടത് എത്ര അത്യാവശ്യമാണെന്നും വ്യക്തമാക്കി ജപ്പാനില്‍ നിന്നൊരു വൈറല്‍ വീഡിയോ. ജപ്പാനിലെ ദേശിയ ടെലിവിഷന്‍ ചാനലായ എന്‍.എച്ച്.കെയാണ് മെഡിക്കല്‍ വിദഗ്ധരുമായി ചേര്‍ന്ന് വീഡിയോ തയ്യാറാക്കിയത്.
വീഡിയോയില്‍ ഒരാളുടെ കൈയ്യില്‍ അദൃശ്യമായ ഫ്‌ളൂറസെന്റ് പെയിന്റ് പുരട്ടുന്നു. തുടര്‍ന്ന് ഇയാള്‍ പത്തു പേരോടൊപ്പം ഒരു റെസ്റ്റോറന്റില്‍ ഭക്ഷണം കഴിക്കുന്നു. അരമണിക്കൂറിനുള്ളില്‍ തീന്‍ മേശയിലെ വെളിച്ചം അണയുമ്പോള്‍ ഫ്‌ളൂറസെന്റ് പെയ്ന്റിന്റെ നിറം തെളിയുന്നു.
ആ തീന്‍മേശയിലിരുന്ന മറ്റുള്ളവരുടെ കൈയ്യിലും ഭക്ഷണ പാത്രങ്ങളിലും ഫ്‌ളൂറസെന്റ് പെയിന്റിന്റെ നീല നിറം തെളിയുന്നു. അര മണിക്കൂറിനുള്ളില്‍ അത്ര വലിയ തോതില്‍ ഈ ഫ്‌ളൂറസെന്റ് പെയ്ന്റ് ഒരാളുടെ കൈയ്യില്‍ നിന്നും വ്യാപിച്ചിരുന്നു. ഒരാളില്‍ നിന്നും കൊറോണ വൈറസ് പടരുന്നത് എത്ര വേഗമാണെന്ന് ലളിതമായി കാണിച്ചു തരികയാണ് ഈ വീഡിയോ.