തിരുവനന്തപുരം: വട്ടിയൂര്‍ക്കാവില്‍ ബി.ജെ.പി മുന്‍ സംസ്ഥാനാധ്യക്ഷന്‍ കുമ്മനം രാജശേഖരന് സീറ്റ് നിഷേധിച്ചതിനു കാരണം സംഘടനാ സെക്രട്ടറി ബി.എല്‍ സന്തോഷിന്റെ ഇടപെടല്‍. സന്തോഷ് ദേശീയ നേതൃത്വത്തില്‍ ചെലുത്തിയ സമ്മര്‍ദ്ദമാണ് ജില്ലാ പ്രസിഡന്റ് എസ്. സുരേഷിന് നറുക്കു വീഴാന്‍ കാരണം.
മൂന്നു സ്ഥാനാര്‍ഥികളുടെ പട്ടികയാണ് വട്ടിയൂര്‍ക്കാവിലേക്ക് ബി.ജെ.പി സംസ്ഥാന സമിതി ദേശീയ നേതൃത്വത്തിനു നല്‍കിയത്. കുമ്മനത്തെ ആര്‍.എസ്.എസാണു നാമനിര്‍ദ്ദേശം ചെയ്തത്. സുരേഷും വി.വി രാജേഷുമായിരുന്നു മറ്റു പേരുകാര്‍.
എന്നാല്‍ ദല്‍ഹിയില്‍ പേരുകളെത്തിയപ്പോള്‍ സന്തോഷ് ഇടപെടുകയും സുരേഷിനു വേണ്ടി വാദിക്കുകയുമായിരുന്നു. സന്തോഷ് തിരുവനന്തപുരത്തെത്തുമ്പോഴെല്ലാം അടുത്ത അനുയായിയായി കൂടെക്കൂട്ടിയിരുന്നതു സുരേഷിനെയായിരുന്നു.
അതേസമയം മണ്ഡലവുമായി ബന്ധമുള്ള വി.വി രാജേഷിനു വേണ്ടി കേന്ദ്ര സഹമന്ത്രിയും മുന്‍ സംസ്ഥാനാധ്യക്ഷനുമായ വി. മുരളീധരന്‍ സമ്മര്‍ദ്ദം ചെലുത്തി. എന്നാല്‍ രാജേഷിനെ വെട്ടിയതും സന്തോഷിന്റെ ഇടപെടലാണ്.
2016 ല്‍ കെ. മുരളീധരനോട് ശക്തമായ മത്സരം കാഴ്ചവെച്ച കുമ്മനത്തിന് ഇത്തവണ ജയിക്കാനാകുമെന്നായിരുന്നു പ്രതീക്ഷ. മുതിര്‍ന്ന നേതാവും എം.എല്‍.എയുമായ ഒ. രാജഗോപാലും സമാനമായ അഭിപ്രായം പങ്കുവെച്ചിരുന്നു.
ഇക്കഴിഞ്ഞ ലോക്സഭാ തെരഞ്ഞെടുപ്പില്‍ ഒരുലക്ഷത്തിനടുത്ത് വോട്ടുകള്‍ക്കാണ് കുമ്മനം ശശി തരൂരിനോട് പരാജയപ്പെട്ടത്. ഒരു സ്ഥാനാര്‍ത്ഥിയെത്തന്നെ വീണ്ടും മത്സരിപ്പിക്കുന്നതില്‍ ഘടകകക്ഷിയായ ബി.ഡി.ജെ.എസിനും എതിര്‍പ്പുണ്ടായിരുന്നു.
