മമതയുടെ വഴിയേ ബി.ജെ.പി.; തോറ്റ സീറ്റില്‍ നിയമപോരാട്ടം നടത്തും
ഡൂള്‍ന്യൂസ് ഡെസ്‌ക്
Saturday, 19th June 2021, 10:30 pm
കൊല്‍ക്കത്ത: തെരഞ്ഞെടുപ്പ് തോല്‍വിയിലും നേതാക്കളുടെ കൊഴിഞ്ഞുപോക്കിലും മുഖം നഷ്ടമായ ബംഗാള്‍ ബി.ജെ.പി. നിയമപോരാട്ടത്തിനൊരുങ്ങുന്നു. നിയമസഭാ തെരഞ്ഞെടുപ്പില്‍ ചെറിയ മാര്‍ജിനില്‍ സീറ്റ് നഷ്ടമായ മണ്ഡലങ്ങളുടെ ഫലം പുനപരിശോധിക്കണമെന്നാവശ്യപ്പെട്ട് ബി.ജെ.പി. ഹരജി നല്‍കും.
സംസ്ഥാന അധ്യക്ഷന്‍ ദിലിപ് ഘോഷ് തന്നെയാണ് ഇക്കാര്യം വ്യക്തമാക്കിയത്. നന്ദിഗ്രാമിലെ തോല്‍വിയില്‍ മമത ബാനര്‍ജിയടക്കം നാല് തൃണമൂല്‍ കോണ്‍ഗ്രസ് നേതാക്കള്‍ കോടതിയില്‍ ഹരജി സമര്‍പ്പിച്ചതിന് പിന്നാലെയാണ് ബി.ജെ.പിയുടെ നീക്കം.
‘നിയമവിദഗ്ധരുമായി ഇക്കാര്യം ചര്‍ച്ച ചെയ്തിട്ടുണ്ട്. സീറ്റുകളെക്കുറിച്ച് ചര്‍ച്ച ചെയ്യുന്നുണ്ട്,’ ദിലിപ് ഘോഷ് പറഞ്ഞു.
നന്ദിഗ്രാമിലെ തോല്‍വിയില്‍ ഹൈക്കോടതിയിലാണ് മമത ഹരജി നല്‍കിയിരിക്കുന്നത്. സുവേന്തു അധികാരിയെ വിജയിയായി പ്രഖ്യാപിച്ചത് റദ്ദാക്കണമെന്നാണ് മമതയുടെ ആവശ്യം.
