ദല്‍ഹിയില്‍ മികച്ച പ്രകടനത്തിനൊരുങ്ങി കോണ്‍ഗ്രസ്; അതില്‍ പ്രതീക്ഷ വച്ച് ബി.ജെ.പി

ന്യൂദല്‍ഹി: ദല്‍ഹി സംസ്ഥാനത്ത് കഴിഞ്ഞ തെരഞ്ഞെടുപ്പില്‍ ആംആദ്മി പാര്‍ട്ടി തങ്ങളില്‍ നിന്ന് പിടിച്ചെടുത്ത വോട്ട് ബാങ്ക് തിരിച്ചു പിടിക്കാനുള്ള ശ്രമത്തിലാണ് കോണ്‍ഗ്രസ്. ഫെബ്രുവരി എട്ടിനാണ് തെരഞ്ഞെടുപ്പ് നടക്കുന്നത്.

കഴിഞ്ഞ തെരഞ്ഞെടുപ്പില്‍ കോണ്‍ഗ്രസിന്റെ നല്ല വിഭാഗം വോട്ടുകളും ആംആദ്മി പാര്‍ട്ടിക്കാണ് ലഭിച്ചത്. ബി.ജെ.പിക്ക് ലഭിച്ചിരുന്ന വോട്ടുകളില്‍ കാര്യമായ കുറവ് സംഭവിച്ചില്ല.

കോണ്‍ഗ്രസ് വോട്ടുകള്‍ ഏതാണ്ട് മുഴുവനായും ആംആദ്മി പാര്‍ട്ടിയിലേക്ക് പോയതോടെ സംസ്ഥാനത്ത് തുടര്‍ച്ചയായി 15 വര്‍ഷം അധികാരത്തിലിരുന്ന പാര്‍ട്ടിക്ക് ഒരു സീറ്റ് പോലും നേടാന്‍ കഴിഞ്ഞിരുന്നില്ല. ഒരേ സ്വഭാവം പുലര്‍ത്തുന്ന വോട്ടര്‍മാരില്‍ പ്രതീക്ഷ പുലര്‍ത്തുന്നതിനാല്‍ സംസ്ഥാനത്ത് കോണ്‍ഗ്രസിന്റെ മുഖ്യശത്രു ആംആദ്മി പാര്‍ട്ടിയാണ്.

വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ

എന്നാല്‍ കഴിഞ്ഞ അഞ്ച് വര്‍ഷം കൊണ്ട് മികച്ച തെരഞ്ഞെടുപ്പ് പ്രവര്‍ത്തന മികവ് കരസ്ഥമാക്കിയിട്ടുണ്ട് ആംആദ്മി പാര്‍ട്ടി. അത് കൊണ്ട് കോണ്‍ഗ്രസില്‍ നിന്ന് വന്ന വോട്ടുകള്‍ തിരികെ പോവില്ലെന്ന പ്രതീക്ഷയിലാണ് ആംആദ്മി പാര്‍ട്ടി.

ഡൂൾന്യൂസ് യൂട്യൂബ് ചാനൽ സബ്സ്ക്രൈബ് ചെയ്യാനായി ഇവിടെ ക്ലിക്ക് ചെയ്യൂ

ഈ തെരഞ്ഞെടുപ്പില്‍ കോണ്‍ഗ്രസ് കാണിക്കുന്ന വീര്യത്തില്‍ പ്രതീക്ഷയര്‍പ്പിക്കുകയാണ് ബി.ജെ.പി. കോണ്‍ഗ്രസ് കൂടുതല്‍ വോട്ടുകള്‍ നേടിയാല്‍ ആംആദ്മി പാര്‍ട്ടിയുടെ വിഹിതം കുറയുമെന്ന് ബി.ജെ.പിക്ക് അറിയാം.

2013 തെരഞ്ഞെടുപ്പില്‍ ആംആദ്മി പാര്‍ട്ടി 70ല്‍ 28 സീറ്റുകളാണ് നേടിയത്. 29.49 ശതമാനം വോട്ടും നേടി. 2015ല്‍ 67 സീറ്റും 54.3 ശതമാനം വോട്ടുമാണ് നേടിയത്.

2013ല്‍ കോണ്‍ഗ്രസ് എട്ട് സീറ്റുകളും 24.55 ശതമാനം വോട്ടും നേടി. എന്നാല്‍ 2015ലേക്കെത്തിയപ്പോള്‍ അത് 9.8 ശതമാനം വോട്ടിലേക്കൊതുങ്ങുകയും സീറ്റൊന്നും നേടാന്‍ കഴിഞ്ഞതുമില്ല.

2013ല്‍ ബി.ജെ.പി 31 സീറ്റും 33.07 ശതമാനം വോട്ടും നേടി. 2015ല്‍ 32.1 ശതമാനം വോട്ട് നേടി. എന്നാല്‍ സീറ്റുകളുടെ എണ്ണം മൂന്നിലേക്ക് ചുരുങ്ങി. ആംആദ്മി പ്രഭാവത്തിലും തങ്ങളുടെ വോട്ട് ശതമാനത്തില്‍ കാര്യമായി കുറഞ്ഞിട്ടില്ലെന്നതാണ് ബി.ജെ.പി കാണുന്നത്.

കോണ്‍ഗ്രസ് ഇത്തവണ കഴിഞ്ഞ തവണത്തേതിനേക്കാള്‍ മെച്ചപ്പെട്ട പ്രകടനം കാഴ്ചവെക്കാനാവുമെന്ന പ്രതീക്ഷയിലാണ്. പൗരത്വ നിയമത്തിനും എന്‍.ആര്‍.സിക്കുമെതിരെ നടത്തിയ പ്രക്ഷോഭം മതേതര വിശ്വാസികളുടെയും മുസ്‌ലിം വിഭാഗങ്ങളുടേയും വോട്ടുകള്‍ ഇക്കുറി നേടിത്തരുമെന്നാണ് കോണ്‍ഗ്രസ് കരുതുന്നത്.

ആര്‍.ജെ.ഡിയുമായി സഖ്യം ഉണ്ടാക്കിയത് വഴി ബീഹാറി വോട്ടര്‍മാരുടെ വോട്ടുകള്‍ നേടാന്‍ സഹായിക്കുമെന്നും അവര്‍ കരുതുന്നു. സോണിയാ ഗാന്ധി, പ്രിയങ്ക ഗാന്ധി, രാഹുല്‍ഡ ഗാന്ധി, നവ്‌ജ്യോത് സിങ് സിദ്ധു എന്നിവരെ പ്രചരണത്തിന് ഇറക്കാനാണ് കോണ്‍ഗ്രസ് തീരുമാനം.