അഗര്‍ത്തല: കൊവിഡ് 19 പോലുള്ള മഹാമാരികളെ പ്രതിരോധിക്കാന്‍ ഇഞ്ചിവെള്ളം കുടിക്കണമെന്ന് ത്രിപുര മുഖ്യമന്ത്രി ബിപ്ലബ് കുമാര്‍ ദേബ്. ഇഞ്ചിവെള്ളം പ്രായമായവരില്‍ പ്രതിരോധശേഷി വര്‍ധിപ്പിക്കുമെന്നും അദ്ദേഹം പറഞ്ഞു.
‘ഞാന്‍ എന്റെ അമ്മയ്ക്ക് ഇന്ന് രാവിലെ ഇഞ്ചിവെള്ളം കൊടുത്തു. നിങ്ങളും നിങ്ങളുടെ അമ്മേയേയും അച്ഛനേയും വീട്ടിലുള്ള പ്രായമായവരേയും ഇത്തരത്തില്‍ പരിപാലിക്കുമെന്ന് വിശ്വസിക്കുന്നു. ഈ വെള്ളം പ്രതിരോധശേഷി വര്‍ധിപ്പിക്കും. ഇതുവഴി കൊറോണ വൈറസ് പോലുള്ള മാരക വൈറസുകളില്‍ നിന്ന് രക്ഷ നേടാം’, ബിപ്ലബ് പറഞ്ഞു.
ഇത്തരത്തില്‍ ഇഞ്ചിവെള്ളം രക്ഷിതാക്കളെ കുടിപ്പിക്കുന്ന ചിത്രങ്ങള്‍ സോഷ്യല്‍മീഡിയയില്‍ പങ്കുവെക്കണമെന്നും അദ്ദേഹം പറഞ്ഞു.
ശനിയാഴ്ച ഗ്രാമങ്ങളിലുള്ളവര്‍ക്ക് ലെമണ്‍ ജ്യൂസും പൈനാപ്പിള്‍ ജ്യൂസും വിതരണം ചെയ്യുന്ന പദ്ധതി മുഖ്യമന്ത്രി പ്രഖ്യാപിച്ചിരുന്നു. എല്ലാ ശനിയാഴ്ചകളിലും വളണ്ടിയര്‍മാര്‍ വഴി ആളുകള്‍ക്ക് ജ്യൂസ് വിതരണം ചെയ്യുന്നതാണ് പദ്ധതി.
