രാഷ്ട്രീയത്തിലെ ജാതി, മത മേല്‍ക്കോയ്മയെ തകര്‍ക്കുന്നതായിരിക്കും ബീഹാര്‍ തെരഞ്ഞെടുപ്പ് ഫലം; രണ്‍ദീപ് സുര്‍ജേവാല

പട്‌ന: രാഷ്ട്രീയത്തിലെ ജാതി-മത മേല്‍ക്കോയ്മയുടെ അന്ത്യത്തിന് തുടക്കം കുറിക്കുന്നതാവും ബീഹാര്‍ തെരഞ്ഞെടുപ്പ് ഫലമെന്ന് കോണ്‍ഗ്രസ് നേതാവ് രണ്‍ദീപ് സുര്‍ജേവാല.

ഭയം, മതം, വിദ്വേഷം എന്നിവ നിറച്ച് ബി.ജെ.പി രാജ്യത്തെ ഭിന്നിപ്പിച്ചു. രാഷ്ട്രീയത്തിലെ ഇത്തരം മത, ജാതി മേല്‍ക്കോയ്മയെ തകര്‍ത്തെറിയുന്നതാവും ബീഹാര്‍ തെരഞ്ഞെടുപ്പ് ഫലം-സുര്‍ജേവാല പറഞ്ഞു.

അധികാരത്തിന് വേണ്ടി പോരാടുന്നവരല്ല മറിച്ച് മാറ്റം ആഗ്രഹിക്കുന്നവരാണ് ബീഹാറിലെ ആര്‍.ജെ.ഡി-കോണ്‍ഗ്രസ് സഖ്യമെന്നും അദ്ദേഹം പറഞ്ഞു. ബീഹാറിന് എന്താണ് വേണ്ടത് അതിനായി പ്രവര്‍ത്തിക്കാനാണ് ഈ സഖ്യമെന്നും അദ്ദേഹം കൂട്ടിച്ചേര്‍ത്തു.

‘ഞാന്‍ മുമ്പും പറഞ്ഞിരുന്നു, മഹാസഖ്യത്തിന് 150 സീറ്റുകള്‍ ലഭിക്കുമെന്ന്. ഞങ്ങള്‍ സീറ്റീനു വേണ്ടിയല്ല മത്സരിക്കുന്നത്. ബീഹാറിനു വേണ്ടിയാണ്’-സുര്‍ജേവാല പറഞ്ഞു.

ബി.ജെ.പി-ജെ.ഡി.യു ഭരണത്തില്‍ ജനങ്ങള്‍ക്ക് വിശ്വാസം നഷ്ടപ്പെട്ടെന്നും അതുകൊണ്ടുതന്നെ തെരഞ്ഞെടുപ്പ് ഫലം തങ്ങള്‍ക്ക് അനുകൂലമായിരിക്കുമെന്നും അദ്ദേഹം പറഞ്ഞു.

എക്‌സിറ്റ് പോള്‍ ഫലങ്ങള്‍ യാഥാര്‍ത്ഥ്യമാകുമെന്നും അദ്ദേഹം പറഞ്ഞു. ബീഹാര്‍ തെരഞ്ഞെടുപ്പ് ഫലത്തിന് ദിവസങ്ങള്‍ മാത്രം ശേഷിക്കെയാണ് സുര്‍ജേവാലയുടെ പ്രതികരണം. നവംബര്‍ പത്തിനാണ് ഫലപ്രഖ്യാപനം.

അതേസമയം ബീഹാറില്‍ മഹാസഖ്യം അധികാരത്തിലേറുമെന്ന് എക്സിറ്റ് പോള്‍ ഫലങ്ങള്‍ പുറത്തുവന്നിരിക്കുകയാണ്. ടൈംസ് നൗ-സീ വോട്ടര്‍ എക്സിറ്റ് പോള്‍ പ്രകാരം മഹാസഖ്യത്തിന് 120 സീറ്റ് ലഭിക്കുമെന്നാണ് പ്രവചനം.

എന്‍.ഡി.എയ്ക്ക് 116 ഉം എല്‍.ജെ.പിയ്ക്കും ഒന്നും സീറ്റാണ് എക്സിറ്റ് പോള്‍ പ്രവചിക്കുന്നത്. മറ്റുള്ളവര്‍ക്ക് ആറ് സീറ്റ് ലഭിക്കുമെന്നും എക്സിറ്റ് പോള്‍ പ്രവചിക്കുന്നു.

റിപ്പബ്ലിക് ടി.വി- ജന്‍ കി ബാത്ത് സര്‍വ്വേയിലും മഹാസഖ്യത്തിനാണ് മുന്നേറ്റം. മഹാസഖ്യം 118 മുതല്‍ 139 വരെ സീറ്റും എന്‍.ഡി.എയ്ക്ക് 91 മുതല്‍ 117 സീറ്റുമാണ് പ്രവചിക്കുന്നത്.

എല്‍.ജെ.പിയ്ക്ക് 5-8 സീറ്റും റിപ്പബ്ലിക് ടി.വി- ജന്‍ കി ബാത് പ്രവചിക്കുന്നു.

എ.ബി.പി എക്സിറ്റ് പോളും മഹാസഖ്യത്തിനാണ് സാധ്യത കല്‍പ്പിക്കുന്നത്. എന്‍.ഡി.എയ്ക്ക് 104-128 ഉം മഹാസഖ്യത്തിന് 108-131 ഉം സീറ്റാണ് പ്രവചനം.

അതേസമയം ഇന്ത്യാ ടി.വി എക്സിറ്റ് പോള്‍ പ്രകാരം എന്‍.ഡി.എയ്ക്കാണ് അനുകൂലം. ആര്‍ക്കും കേവല ഭൂരിപക്ഷം ലഭിക്കില്ലെന്നും എന്‍.ഡി.എ 112 സീറ്റ് നേടുമെന്നും ഇന്ത്യാ ടി.വി പ്രവചിക്കുന്നു. മഹാസഖ്യത്തിന് 110 സീറ്റാണ് പ്രവചിക്കുന്നത്. 243 അംഗ നിയമസഭയില്‍ 122 സീറ്റാണ് കേവല ഭൂരിപക്ഷത്തിന് വേണ്ടത്.

ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും  ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക

ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ

Content Highlights; Bihar election results will  break caste politics says randeep surjewala