ബിഗ് ബോസ് മലയാളം സീസണ്‍ 3 സെറ്റില്‍ തമിഴ്‌നാട് ആരോഗ്യ വകുപ്പിന്റെ പരിശോധന; ഷൂട്ടിംഗ് നിര്‍ത്തിവെച്ചു
എന്റര്‍ടെയിന്‍മെന്റ് ഡെസ്‌ക്
Wednesday, 19th May 2021, 11:07 pm
ചെന്നൈ: ബിഗ് ബോസ് മലയാളം സീസണ്‍ 3യുടെ ഷൂട്ടിംഗ് നിര്‍ത്തിവെച്ചു. തമിഴ്‌നാട് ആരോഗ്യ വകുപ്പിന്റെ നിര്‍ദേശത്തെ തുടര്‍ന്നാണ് നടപടി.
താരങ്ങളെ മറ്റൊരു ഹോട്ടലിലേക്ക് മാറ്റി. നേരത്തെ ബിഗ് ബോസ് സീസണ്‍ 3 ഷൂട്ടിംഗ് നടക്കുന്ന ഇ.വി.പി ഫിലിം സിറ്റിയില്‍ ആരോഗ്യ വകുപ്പിന്റെയും പൊലീസിന്റെയും നേതൃത്വത്തില്‍ പരിശോധന നടത്തിയിരുന്നു.
കൊവിഡ് പശ്ചാത്തലത്തില്‍ സീരിയല്‍ അടക്കമുള്ള എല്ലാ ഷൂട്ടിംഗുകളും നിര്‍ത്തിവെക്കാന്‍ സര്‍ക്കാര്‍ നിര്‍ദേശിച്ചിരുന്നു. ഈ പശ്ചാത്തലത്തിലാണ് സ്റ്റുഡിയോയില്‍ പരിശോധന നടന്നത്.
അതേസമയം ഷൂട്ടിംഗ് നിര്‍ത്തിവെക്കില്ലെന്നായിരുന്നു ബിഗ് ബോസ് അധികൃതര്‍ നേരത്തെ അറിയിച്ചിരുന്നത്. ചെന്നൈയില്‍ ലോക്ക്ഡൗണ്‍ പ്രഖ്യാപിച്ചതിനാല്‍ ഷൂട്ടിംഗ് രണ്ടാഴ്ച കൂടി നീട്ടി വെക്കുകയായിരുന്നു.
