നയതന്ത്രപരിഹാരമുണ്ടാക്കണമെന്ന യു.എന്‍ പ്രമേയം തള്ളി അമേരിക്ക; പിന്നാലെ ഇസ്രാഈല്‍-ഫലസ്തീന്‍ സമാധാനശ്രമങ്ങള്‍ക്ക് പിന്തുണയെന്ന് ബൈഡന്‍
ഡൂള്‍ന്യൂസ് ഡെസ്‌ക്
Tuesday, 18th May 2021, 3:03 pm
ന്യൂയോര്‍ക്ക്: ഗാസയിലെ ഇസ്രാഈലിന്റെ ആക്രമണങ്ങള്‍ തുടരുന്നതിനിടെ സമാധാന ശ്രമങ്ങള്‍ക്ക് പിന്തുണ പ്രഖ്യാപിച്ച് അമേരിക്കന്‍ പ്രസിഡന്റ് ജോ ബൈഡന്‍.
ഇരു രാജ്യങ്ങളും തമ്മിലുള്ള ആക്രമണം അവസാനിപ്പിച്ച് നയതന്ത്ര പരിഹാരമുണ്ടാക്കണമെന്ന ഐക്യരാഷ്ട്രസഭാ രക്ഷാസമിതി പ്രമേയം അമേരിക്ക തന്നെ തള്ളിയതിനു പിന്നാലെയാണ് പുതിയ നീക്കം.
ഇസ്രാഈല്‍ പ്രധാനമന്ത്രി ബെഞ്ചമിന്‍ നെതന്യാഹുവിനെ ഫോണില്‍ വിളിച്ച് സംസാരിച്ച ബൈഡന്‍ ഈജിപ്ത് അടക്കമുള്ള രാഷ്ട്രങ്ങളുമായി ചേര്‍ന്ന് വെടിനിര്‍ത്തല്‍ ശ്രമങ്ങള്‍ നടത്തിവരികയാണെന്നും അറിയിക്കുകയായിരുന്നുവെന്ന് ബി.ബി.സി റിപ്പോര്‍ട്ട് ചെയ്യുന്നു.
എട്ടു ദിവസം നീണ്ട ഇസ്രാഈല്‍ ആക്രമണത്തില്‍ നിരവധി ജീവനുകളാണ് ഗാനയില്‍ പൊലിഞ്ഞത്. ആക്രമണങ്ങളില്‍ 62 കുട്ടികളും 38 സ്ത്രീകളും അടക്കം 212 ഫലസ്തീനികളാണ് ഇതുവരെ കൊല്ലപ്പെട്ടത്.
