കൊൽക്കത്ത: വഖഫ് ഭേദഗതി ബില്ലിനെതിരെ, ഓൾ ഇന്ത്യ മുസ്‌ലിം പേഴ്‌സണൽ ലോ ബോർഡിന്റെ (എ.ഐ.എം.പി.എൽ.ബി) ആഭിമുഖ്യത്തിൽ പ്രതിഷേധം സംഘടിപ്പിക്കാനൊരുങ്ങി പശ്ചിമ ബംഗാളിലെ മുസ്‌ലിം സംഘടനകൾ. തിങ്കളാഴ്ച കൊൽക്കത്തയിലെ മെട്രോ ചാനലിൽ സംഘടനകൾ പ്രതിഷേധ പ്രകടനം നടത്തും.
ശനിയാഴ്ച നടന്ന പത്രസമ്മേളനത്തിൽ നിരവധി സംഘടനകളുടെ പ്രതിനിധികൾ ബില്ലിനെ പൂർണ്ണമായും എതിർക്കുന്നുവെന്ന് പറഞ്ഞു. ‘തിങ്കളാഴ്ച ഞങ്ങൾ കൊൽക്കത്തയിൽ പ്രതിഷേധിക്കും, തുടർന്ന് മാർച്ച് 13 ന് ദൽഹിയിലെ ജന്തർ മന്തറിൽ പ്രതിഷേധം നടത്തും. അതിനുശേഷം അടുത്ത നടപടികളെക്കുറിച്ച് ഞങ്ങളുടെ നേതാക്കൾ അറിയിക്കും. ഇത് ഞങ്ങൾക്ക് റംസാൻ മാസമാണ്, പക്ഷേ ഞങ്ങൾ ഞങ്ങളുടെ പോരാട്ടം തുടരും,’ എ.ഐ.എം.പി.എൽ.ബി അംഗം മൗലാന ഖമറുസമാൻ എസ്.ബി പറഞ്ഞു.
സമ്മേളനത്തിൽ പങ്കെടുത്ത നേതാക്കളും അംഗങ്ങളും പറയുന്നതനുസരിച്ച്, പ്രത്യേക നിയമ പദവിയുള്ള ഒരേയൊരു എൻഡോവ്‌മെന്റ് ബോർഡ്, വഖഫ് ബോർഡ് മാത്രമല്ല, മറിച്ച് ഇന്ത്യയിലെ എല്ലാ മത എൻഡോവ്‌മെന്റ് ബോർഡുകളിലും സമാനമായ വ്യവസ്ഥകളുണ്ട്.
വഖഫ് ബോർഡിന്റെ അധികാരങ്ങൾ എടുത്തുകളയുമ്പോൾ, മറ്റ് മത എൻഡോവ്‌മെന്റ് ബോർഡുകൾ അതിന്റെ സ്വയംഭരണ പദവിയിൽ തുടരുകയാണെങ്കിൽ, അത് ഭരണഘടനയുടെ ആർട്ടിക്കിൾ 14ന്റെ വ്യക്തമായ ലംഘനമാകുമെന്ന് അവർ പറഞ്ഞു. ‘വഖഫ് നിയമ ഭേദഗതി ഭരണഘടനയിൽ ഉൾപ്പെടുത്തിയിരിക്കുന്ന മറ്റ് നിരവധി മൗലികാവകാശങ്ങൾക്ക് ഭീഷണിയാകും’ എന്നും അവർ പറഞ്ഞു.
സംയുക്ത പാർലമെന്ററി കമ്മിറ്റിക്ക് (ജെ.പി.സി) നിരവധി ഇമെയിലുകൾ അയയ്ക്കുകയും, എ.ഐ.എം.പി.എൽ.ബിയിൽ നിന്നും മറ്റ് പ്രധാന കേന്ദ്ര, സംസ്ഥാന തല മുസ്‌ലിം സംഘടനകളിൽ നിന്നും പ്രതിഷേധം അറിയിക്കുകയും ചെയ്തിട്ടും സർക്കാർ നിലപാട് മയപ്പെടുത്തിയിട്ടില്ലെന്ന് പ്രതിനിധികൾ പറയുന്നു.
പശ്ചിമ ബംഗാൾ സർക്കാർ ബില്ലിനെതിരെ സംസ്ഥാന നിയമസഭയിൽ ഒരു പ്രമേയം പാസാക്കിയതായി പ്രതിനിധികൾ പറഞ്ഞു.
ജനാധിപത്യ രാജ്യങ്ങളിൽ, ഏതൊരു നിയമമോ ബില്ലോ നിയമസഭയിൽ അവതരിപ്പിക്കുന്നതിന് മുമ്പ് ആദ്യം അതിന്റെ പ്രാഥമിക പങ്കാളികളുമായി ചർച്ച ചെയ്യണമെന്ന് മുസ്‌ലിം നേതാക്കൾ പറഞ്ഞു. ഇതിന് മുമ്പ് വഖഫ് നിയമങ്ങളിൽ ഭേദഗതികൾ വരുത്തുമ്പോഴെല്ലാം, മുസ്‌ലിം പണ്ഡിതന്മാരുമായും സമുദായ നേതാക്കളുമായും കൂടിയാലോചിക്കുകയും അവരുടെ അഭിപ്രായങ്ങളും നിർദേശങ്ങളും പരിഗണിക്കുകയും ചെയ്തിരുന്നു.
എന്നാൽ ഇത്തവണ ബിൽ പാർലമെന്റിൽ അവതരിപ്പിക്കുന്നതിന് മുമ്പ്, മുസ്‌ലിം നേതാക്കളുമായോ സംഘടനകളുമായോ യാതൊരു കൂടിയാലോചനകളോ ചർച്ചകളോ നടന്നിട്ടില്ലെന്ന് അവർ വിമർശിച്ചു.
Content Highlight: Bengal: Muslim groups to protest against Waqf Amendment Bill on Monday
