മുംബൈ: മഹേന്ദ്രസിംഗ് ധോണിയെ ടി-20 ലോകകപ്പ് ഉപദേശക സ്ഥാനത്ത് (മെന്റര്‍) നിയമിച്ചതിനെതിരെ ബി.സി.സി.ഐയില്‍ പരാതി. ലോധ കമ്മിറ്റി പരിഷ്‌കാരങ്ങള്‍ക്ക് വിരുദ്ധമായാണ് ധോണിയെ പരിഗണിച്ചതെന്നാണ് പരാതി.
മധ്യപ്രദേശ് ക്രിക്കറ്റ് അസോസിയേഷന്‍ മുന്‍ അംഗം സഞ്ജീവ് ഗുപ്തയാണ് ബി.സി.സി.ഐയ്ക്ക് പരാതി നല്‍കിയിരിക്കുന്നത്. ബി.സി.സി.ഐ അധ്യക്ഷന്‍ സൗരവ് ഗാംഗുലിയ്ക്കും സെക്രട്ടറി ജയ് ഷായ്ക്കുമാണ് പരാതി നല്‍കിയിരിക്കുന്നത്.
ലോധ കമ്മിറ്റി ശുപാര്‍ശ പ്രകാരം ഒരാള്‍ക്ക് രണ്ട് സ്ഥാനങ്ങളിലിരിക്കുന്നതിന് തടസമുണ്ട്. ധോണി നിലവില്‍ ഐ.പി.എല്ലില്‍ ചെന്നൈ സൂപ്പര്‍കിംഗ്‌സിന്റെ ക്യാപ്റ്റനാണ്. ധോണിയെ ദേശീയ ടീം ഉപദേശക സ്ഥാനത്തേക്ക് നിയമിക്കുന്നത് ചട്ടവിരുദ്ധമാണെന്നാണ് സഞ്ജീവ് പറയുന്നത്.
ബി.സി.സി.ഐ ഭരണഘടനയുടെ 38(4) ക്ലോസ് പ്രകാരം ഇരട്ടപദവി അനുവദിക്കില്ലെന്നാണ് പറയുന്നത്. ഇത് മുന്‍നിര്‍ത്തിയാണ് സഞ്ജീവിന്റെ പരാതി.
പ്രഥമ ടി-20 ചാംപ്യന്‍ഷിപ്പില്‍ ഇന്ത്യയെ കിരീടത്തിലേക്ക് നയിച്ചത് ധോണിയായിരുന്നു. ഈ വര്‍ഷം നടക്കുന്ന ടി-20 ലോകകപ്പിനുള്ള ഇന്ത്യന്‍ ക്രിക്കറ്റ് ടീമിനെ കഴിഞ്ഞ ദിവസമാണ് പ്രഖ്യാപിച്ചത്.
ഏറെ കാലമായി നിശ്ചിത ഓവര്‍ ക്രിക്കറ്റിന് പുറത്തുള്ള രവിചന്ദ്ര അശ്വിന്റെ ടീമിലേക്ക് തിരിച്ചു വന്നപ്പോള്‍ യൂസ്‌വേന്ദ്ര ചഹലിനും ചൈനാമാന്‍ ബൗളര്‍ കുല്‍ദീപ് യാദവ് എന്നിവര്‍ക്കും ടീമില്‍ ഇടം നേടാനായില്ല. മലയാളി താരം സഞ്ജു സാംസണ്‍, ശിഖര്‍ ധവാന്‍ എന്നിവര്‍ക്കും ടീം പ്രഖ്യാപനത്തില്‍ നിരാശപ്പെടേണ്ടി വന്നു.
ഒക്ടോബര്‍ 17 മുതല്‍ നവംബര്‍ 14 വരെ ഒമാനിലും യു.എ.ഇയിലുമായിട്ടാണ് ടൂര്‍ണമെന്റ് നടക്കുന്നത്.
വിരാട് കോഹ്‌ലി നയിക്കുന്ന ടീമിന്റെ വൈസ് ക്യാപ്റ്റന്‍ രോഹിത് ശര്‍മയാണ്. കെ.എല്‍. രാഹുല്‍, സൂര്യകുമാര്‍ യാദവ്, ഋഷഭ് പന്ത്, ഇഷാന്‍ കിഷന്‍, ഹര്‍ദിക് പാണ്ഡ്യ, ആര്‍. അശ്വിന്‍, രവീന്ദ്ര ജഡേജ, രാഹുല്‍ ചാഹര്‍, അക്‌സര്‍ പട്ടേല്‍, വരുണ്‍ ചക്രവര്‍ത്തി, ജസ്പ്രീത് ബുംറ, ഭുവനേശ്വര്‍ കുമാര്‍, മുഹമ്മദ് ഷമി എന്നിവരാണ് ടി- 20 ചാംപ്യന്‍ഷിപ്പില്‍ ഇന്ത്യന്‍ ടീമിന്റെ ഭാഗമാവുക.
പതിനഞ്ചംഗ ടീമിനൊപ്പം ശ്രേയസ് അയ്യര്‍, ഷാര്‍ദുല്‍ താക്കൂര്‍, ദീപക് ചാഹര്‍ എന്നിവരെ സ്റ്റാന്‍ഡ്‌ബൈ താരങ്ങളായും ഉള്‍പ്പെടുത്തിയിട്ടുണ്ട്.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം
Content Highlight: BCCI Receives Conflict Of Interest Complaint Against MS Dhoni’s Appointment As Mentor For T20 World Cup: Report