പാകിസ്ഥാന് പേസര്‍മാര്‍ക്കെതിരെ വലിയ സ്‌കോര്‍ നേടാനുള്ള കഴിവ് ഇന്ത്യന്‍ ബാറ്റര്‍മാര്‍ക്കുണ്ടെന്ന് ബാറ്റിങ് കോച്ച് വിക്രം റാത്തൂര്‍. ഏഷ്യാ കപ്പിലെ രണ്ടാം മത്സരത്തില്‍ ഇന്ത്യ നേപ്പാളിനെ 10 വിക്കറ്റിന് പരാജയപ്പെടുത്തിയതിന് ശേഷമുള്ള പത്രസമ്മേളനത്തിലായിരുന്ന് റാത്തൂറിന്റെ പ്രതികരണം.
ശനിയാഴ്ച പാകിസ്ഥാനെതിരെ നടന്ന മത്സരത്തില്‍ പേസര്‍മാരായ അഫ്രീദിയും ഹാരിസ് റൗഫും ഇന്ത്യന്‍ ടോപ്പ് ഓര്‍ഡറിനെ വിറപ്പിച്ചിരുന്നു. മത്സരത്തിന്റെ തുടക്കത്തില്‍ തന്നെ ഇന്ത്യയെ 15 ഓവറില്‍ നാല് വിക്കറ്റ് നഷ്ടത്തില്‍ 66 റണ്‍സ് എന്ന നിലയില്‍ പാക് പേസര്‍മാര്‍ എറിഞ്ഞുവീഴ്ത്തിയിരുന്നു. പിന്നീട് ഇഷാന്‍ കിഷന്റെയും ഹാര്‍ദിക്കിന്റെയും മികച്ച ഇന്നിങ്‌സുകളാണ് ഇന്ത്യയെ മത്സരത്തിലേക്ക് തിരിച്ചുകൊണ്ടുവന്നത്. ഈ സാഹചര്യത്തിലാണ് പാകിസ്ഥാനെ വരും മത്സരങ്ങളില്‍ നേരിടുന്നതിനെക്കുറിച്ച് റാത്തൂര്‍ സംസാരിക്കുന്നത്.
വിക്രം റാത്തൂര്‍
‘ഇനി വരാന്‍ പോവുന്ന മത്സരത്തില്‍ ടീം ഇന്ത്യ നന്നായി ബാറ്റ് ചെയ്യാന്‍ ശ്രമിക്കും. ആദ്യ മത്സരത്തിലെ സാഹചര്യങ്ങള്‍ വ്യത്യസ്തമായിരുന്നു. പാകിസ്ഥാന് മികച്ച ബൗളിങ് നിരയുണ്ട്. എന്നാല്‍ ഞങ്ങള്‍ക്ക് അവരെ നേരിടാന്‍ കഴിയാത്തവരല്ല. ചില ദിവസങ്ങളില്‍ അവര്‍ക്ക് മുന്‍തൂക്കം ഉണ്ടാകും. ഒരു മികച്ച തുടക്കം ലഭിക്കുമ്പോള്‍, ടീം ഇന്ത്യയുടെ ബാറ്റര്‍മാര്‍ ഒരു വലിയ സ്‌കോര്‍ പടുത്തുയര്‍ത്താന്‍ പ്രാപ്തരാണ്,’ റാത്തൂര്‍ പറഞ്ഞു.
പാക്കിസ്ഥാനെതിരായ മത്സരത്തില്‍ പക്വതയോടെ സാഹചര്യമനുസരിച്ചുകൊണ്ട് ഇന്നിങ്സ് മുന്നോട്ട് കൊണ്ടുപോയ ഇഷന്‍ കിഷന്റെ പ്രകടനം കണ്ട് അത്ഭുതപ്പെട്ടുവെന്നും റാത്തൂര്‍ പറഞ്ഞു.
കരിയറില്‍ ആദ്യമായി അഞ്ചാം പൊസിഷനില്‍ ഇറങ്ങി ബാറ്റ് ചെയ്ത കിഷന്‍ പാകിസ്ഥാനെതിരെ 81 പന്തില്‍ 82 റണ്‍സാണ് നേടിയത്. മറുഭാഗത്ത് ഹര്‍ദിക് പാണ്ഡ്യ 90 പന്തില്‍ 87 റണ്‍സ് നേടികൊണ്ട് മികച്ച പ്രകടനം നടത്തുകയും ചെയ്തു. കെ.എല്‍. രാഹുലും ഇഷന്‍ കിഷനും ഇന്ത്യക്ക് മധ്യനിരയില്‍ മികച്ച പ്രകടനം കാഴ്ചവെക്കാന്‍ സാധിക്കുമെന്നും റാത്തൂര്‍ പറഞ്ഞു.
പാകിസ്ഥാനെതിരെ ഇഷന്‍ നന്നായി കളിച്ചു. കഴിഞ്ഞ രണ്ട് വര്‍ഷമായി കെ.എല്‍. രാഹുല്‍ ടീമിന് വേണ്ടി മികച്ച പ്രകടനം കാഴ്ചവെച്ചിട്ടുണ്ട്.
അതുകൊണ്ടുതന്നെ പൊരുതിവീഴുന്ന രണ്ട് ബാറ്റര്‍മാര്‍ ഉണ്ടാകുന്നതിന് പകരം ഇത്തരം കളിക്കാരെ തിരഞ്ഞെടുക്കുന്നതാണ് നല്ലതെന്നും റാത്തൂര്‍ അഭിപ്രായപ്പെട്ടു.
Content Highlight: Batting coach Vikram Rathore says Indian batsmen have the ability to score big against Pakistan pacers