ഈ വര്‍ഷം മലയാളത്തിലെ ഏറ്റവും വലിയ വിജയമായി മാറിയ ചിത്രമാണ് ആവേശം. രോമാഞ്ചത്തിന് ശേഷം ജിത്തു മാധവന്‍ സംവിധാനം ചെയ്ത ചിത്രത്തില്‍ ഫഹദ് ഫാസിലായിരുന്നു പ്രധാന കഥാപാത്രത്തെ അവതരിപ്പിച്ചത്. ബോക്‌സ് ഓഫീസില്‍ 150 കോടിയിലേറെ നേടിയ ചിത്രം ഒ.ടി.ടി റിലീസിന് ശേഷം കേരളത്തിന് പുറത്തും വലിയ രീതിയില്‍ ചര്‍ച്ചയായി. രംഗന്‍ എന്ന ഗ്യാങ്സ്റ്ററായി അസാധ്യ പെര്‍ഫോമന്‍സാണ് ഫഹദ് കാഴ്ചവെച്ചത്.
ഇപ്പോഴിതാ ചിത്രം തെലുങ്കിലേക്ക് റീമേക്ക് ചെയ്താല്‍ ഫഹദിന്റെ വേഷത്തിലേക്ക് നസ്രിയ ആരെ നിര്‍ദേശിക്കുമെന്ന് പറയുകയാണ് ബേസില്‍ ജോസഫ്. തെലുങ്കിന്റെ റീമേക്ക് റൈറ്റ്‌സ് വിറ്റുപോയെന്ന് കേട്ടെന്നും ഒരു വലിയ നടന് ആ വേഷം ചെയ്യുമെന്നും കേട്ടെന്നും ബേസില്‍ പറഞ്ഞു. എന്നാല്‍ ആ കാര്യത്തില്‍ തീരുമാനമായില്ലെങ്കില്‍ നസ്രിയ തീര്‍ച്ചയായും നാനിയുടെ പേര് നിര്‍ദേശിക്കുമെന്ന് ബേസില്‍ കൂട്ടിച്ചേര്‍ത്തു.
അന്‍ടേ സുന്ദരാനികി എന്ന സിനിമയില്‍ നാനിയും നസ്രിയയും ഒന്നിച്ചഭിനയിച്ചിട്ടുണ്ടായിരുന്നെന്നും ആ ഒരു കാരണം കൊണ്ട് നാനിയുടെ പേര് മാത്രമേ നസ്രിയ പറയുള്ളൂവെന്നും ബേസില്‍ പറഞ്ഞു. തന്റെ അഭിപ്രായത്തിലും നാനി തന്നെയാണ് ആ കഥാപാത്രം ചെയ്യാന്‍ മികച്ചയാളെന്നും ബേസില്‍ കൂട്ടിച്ചേര്‍ത്തു. പുതിയ ചിത്രമായ സൂക്ഷ്മദര്‍ശിനിയുടെ പ്രൊമോഷനുമായി ബന്ധപ്പെട്ട് മൈല്‍സ്റ്റോണ്‍ മേക്കേഴ്‌സിനോട് സംസാരിക്കുകയായിരുന്നു ബേസില്‍ ജോസഫ്.
‘ആവേശം തെലുങ്ക് വേര്‍ഷന്റെ റീമേക്ക് റൈറ്റ്‌സ് വിറ്റുപോയെന്നും ഏതോ ഒരു വലിയ നടന് ആ റോള്‍ ചെയ്യുമെന്ന് ഉറപ്പായെന്നും എവിടെയോ വായിച്ചുകേട്ടു. അത് ഉള്ളതാണോ അല്ലയോ എന്നൊന്നും എനിക്കറിയില്ല. ഇനി അങ്ങനെ നടന്നിട്ടില്ലെങ്കില്‍ ഫഫ ചെയ്ത റോള്‍ നാനി ചെയ്യണമെന്നാകും നസ്രിയ പറയുക. അവര്‍ ഒരുമിച്ച് അന്‍ടേ സുന്ദരാനികി ചെയ്തതാണല്ലോ. അപ്പോള്‍ ആ ഒരു കണക്ഷന്‍ വെച്ച് നാനിയുടെ പേര് മാത്രമേ പറയാന്‍ ചാന്‍സുള്ളൂ. എന്റെ അഭിപ്രായത്തിലും നാനി തന്നെയാണ് ആ റോള്‍ ചെയ്യാന്‍ ബെസ്റ്റ്,’ ബേസില്‍ പറഞ്ഞു.
അതേസമയം ബേസില്‍ ജോസഫും, നസ്രിയയും പ്രധാനവേഷത്തിലെത്തിയ സൂക്ഷ്മദര്‍ശിന് മികച്ച പ്രതികരണവുമായി മുന്നേറുകയാണ്. ത്രില്ലര്‍ ഴോണറില്‍ പെടുന്ന ചിത്രത്തില്‍ ഇരുവരുടെയും പ്രകടനത്തെ പലരും പ്രശംസിക്കുന്നുണ്ട്. റിലീസ് ചെയ്ത് രണ്ട് ദിവസത്തിനുള്ളില്‍ 10 കോടിക്കുമുകളില്‍ ബോക്‌സ് ഓഫീസില്‍ നിന്ന് കളക്ട് ചെയ്തുകഴിഞ്ഞു.
Content Highlight: Basil Joseph says that Nazriya will suggest Nani’s name to do the role of Fahadh in Aavesham movie Telugu remake
