ഇനി ബേസിലും മുഹ്‌സിനും ഹര്‍ഷദും; 'കഠിന കഠോരമീ അണ്ഡകടാഹം'

ബേസില്‍ കേന്ദ്ര കഥാപാത്രത്തെ അവതരിപ്പിക്കുന്ന പുതിയ ചിത്രമെത്തുന്നു. ഉണ്ട, പുഴു എന്നീ ചിത്രങ്ങള്‍ക്ക് ശേഷം ഹര്‍ഷദ് തിരക്കഥയൊരുക്കുന്ന ‘കഠിന കഠോരമീ അണ്ഡകടാഹം’ എന്ന സിനിമയാണ് ഇപ്പോള്‍ പ്രഖ്യാപിച്ചിരിക്കുന്നത്. സിനിമയുടെ ടൈറ്റില്‍ പോസ്റ്ററാണ് ഇപ്പോള്‍ പുറത്തുവന്നിരിക്കുന്നത്.

കോഴിക്കോട് പശ്ചാത്തലമായുള്ള സിനിമയായിരിക്കുമെന്നാണ് ഫസ്റ്റ് ലുക്ക് പോസ്റ്ററില്‍ നിന്നും ലഭിക്കുന്ന സൂചനകള്‍. കടലും കോയിക്കോട് എന്ന് എഴുതി വെച്ചിരിക്കുന്നതും ലൈറ്റ് ഹൗസുമെല്ലാം പോസ്റ്ററിലുണ്ട്.

ഗള്‍ഫ് കറി പൗഡറിന്റെ പരസ്യത്തില്‍ നില്‍ക്കുന്ന ജാഫര്‍ ഇടുക്കിയെയും കടലിലേക്ക് നോക്കിനില്‍ക്കുന്ന ബേസിലിനെയും കൂടി പരസ്യത്തില്‍ കാണാം. കോഴിക്കോടുകാര്‍ക്ക് വായിച്ചെടുക്കാനാവുന്ന ഒരുപാട് കുഞ്ഞു കാര്യങ്ങള്‍ ചേര്‍ത്താണ് പോസ്റ്റര്‍ തയ്യാറാക്കിയിരിക്കുന്നത്.

നവാഗതനായ മുഹാഷിന്‍ സംവിധാനം ചെയ്യുന്ന ചിത്രം നിര്‍മ്മിക്കുന്നത് നൈസാം സലാമാണ്. ഗോവിന്ദ് വസന്തയാണ് സംഗീതം. മുഹ്‌സിന്‍ പരാരിയും ഷറഫും ചേര്‍ന്നാണ് പാട്ടിന് വരികള്‍ എഴുതുന്നത്. തല്ലുമാലക്ക് വേണ്ടി മുഹ്‌സിന്‍ എഴുതിയ പ്രാദേശിക സ്ലാങ്ങിലുള്ള വരികള്‍ വലിയ ശ്രദ്ധ നേടിയിരുന്നു.

അതേസമയം ബേസില്‍ നായകനായി എത്തുന്ന ചിത്രങ്ങളെ ഇരുകയ്യും നീട്ടിയാണ് പ്രേക്ഷകര്‍ സ്വീകരിക്കുന്നത്. പാല്‍തു ജാന്‍വര്‍ തിയേറ്ററുകളില്‍ മികച്ച വിജയം നേടി മുന്നേറുകയാണ്.

ജാന്‍ എ മന്നിലൂടെ കേന്ദ്ര കഥാപാത്രങ്ങളെ അവതരിപ്പിക്കാന്‍ തുടങ്ങിയ ബേസിലിനെ കാത്ത് നിരവധി ചിത്രങ്ങളാണ് ഒരുങ്ങുന്നത്. ദര്‍ശന രാജേന്ദ്രനൊപ്പമുള്ള ജയ ജയ ഹേ എന്ന ചിത്രത്തിന്റെ ടൈറ്റില്‍ പോസ്റ്ററും കഴിഞ്ഞ ദിവസം പുറത്തുവന്നിരുന്നു.

ഈ വര്‍ഷം അഭിനയത്തിലാണ് കൂടുതല്‍ ശ്രദ്ധിക്കാനാഗ്രഹിക്കുന്നതെന്നും നടനെന്ന നിലയില്‍ കൂടുതല്‍ ഉത്തരവാദിത്തമുണ്ടെന്നും ഡൂള്‍ന്യൂസിന് നല്‍കിയ അഭിമുഖത്തില്‍ ബേസില്‍ പറഞ്ഞിരുന്നു.

Content Highlight: Basil Joseph new movie Kadina Kadoramee Andakadaham title poster released