സ്ഫടികം എന്ന എക്കാലത്തേയും മികച്ച മലയാള ചിത്രങ്ങളിലൊന്ന് പ്രേക്ഷകര്‍ക്ക് സമ്മാനിച്ച കൂട്ടുകെട്ടാണ് മോഹന്‍ലാല്‍-ഭദ്രന്‍ കോമ്പോ. ചിത്രത്തിന്റെ റീമാസ്റ്ററിങ് വേര്‍ഷന്‍ വീണ്ടും തിയേറ്ററുകളിലെത്തിയിരിക്കുകയാണ്. വലിയ ആവേശത്തോടെയാണ് ചിത്രത്തെ പ്രേക്ഷകര്‍ സ്വീകരിച്ചത്.
മോഹന്‍ലാലിനൊപ്പം ജി കെനി എന്നൊരു ചിത്രവും ഭദ്രന്‍ പ്രഖ്യാപിച്ചിരുന്നു. ഇതുവരെ കാണാത്ത ലാലിനെയായിരിക്കും ചിത്രത്തില്‍ കാണുകയെന്നും ഭദ്രന്‍ പറഞ്ഞിരുന്നു. സ്ഫടികം റീ റിലീസിനോടനുബന്ധിച്ച് നടത്തിയ പ്രെസ് മീറ്റില്‍ ജിം കെനിയെ പറ്റി കൂടുതല്‍ വിശേഷങ്ങള്‍ പങ്കുവെക്കുകയാണ് ഭദ്രന്‍. മാസും ഫൈറ്റും റൊമാന്‍സുമെല്ലാം ഉള്ള ചിത്രം മലയാളത്തിലെ ആദ്യത്തെ പാന്‍ ഇന്ത്യന്‍ ചിത്രമാവുമെന്ന് ഭദ്രന്‍ പ്രസ് മീറ്റില്‍ പറഞ്ഞു.
‘മോഹന്‍ലാലിനൊപ്പമുള്ള പടം ഈ വര്‍ഷം അവസാനം ഉണ്ടാവും. വലിയ സ്‌കെയ്‌ലില്‍ വലിയ സിനിമ ആയതുകൊണ്ട് കാര്യങ്ങള്‍ പ്രിപ്പയര്‍ ചെയ്തുവേണം ചെയ്യാനായി. അതൊരു മാസ് സിനിമ ആയിരിക്കും. മാസും ലൈഫും ലാഫും റൊമാന്‍സുമെല്ലാമുള്ള സിനിമയായിരിക്കും ഇത്. ചിലപ്പോള്‍ ആദ്യത്തെ പാന്‍ ഇന്ത്യന്‍ സിനിമ. പലപ്പോഴും പാന്‍ ഇന്ത്യന്‍ സിനിമ എന്ന് കേള്‍ക്കുന്നതല്ലാതെ ഏത് ഡൈമെന്‍ഷനിലാണ് പാന്‍ ഇന്ത്യന്‍ സിനിമ എന്ന് പറയുന്നതെന്ന് എനിക്ക് അറിയില്ല. ഞാനുണ്ടാക്കുന്ന ഒരു പാന്‍ ഇന്ത്യന്‍ സിനിമ ഉണ്ട്. അതായിരിക്കാം ഈ സിനിമ,’ ഭദ്രന്‍ പറഞ്ഞു.
