മുംബൈ: ഇന്ധനവില വര്‍ധനവിനെതിരെ പ്രതികരിക്കാത്തതില്‍ ബോളിവുഡ് താരങ്ങളായ അമിതാഭ് ബച്ചന്റെയും അക്ഷയ് കുമാറിന്റെയും ചിത്രങ്ങളുടെ ഷൂട്ടിംഗ് വിലക്കുമെന്ന മഹാരാഷ്ട്ര കോണ്‍ഗ്രസ് നിലപാടിനോട് പ്രതികരിച്ച് സംസ്ഥാന ബി.ജെ.പി നേതൃത്വം.
കോണ്‍ഗ്രസിന്റെ അടിസ്ഥാന സ്വഭാവം സ്വേച്ഛാധിപത്യമാണെന്നും ജനാധിപത്യത്തിന്റെ മുഖംമൂടി അണിഞ്ഞാണ് ഇപ്പോള്‍ പ്രവര്‍ത്തിക്കുന്നതെന്നും ബി.ജെ.പി നേതാവായ സുധീര്‍ മുങ്കാന്തിവാര്‍ പറഞ്ഞു.
‘കോണ്‍ഗ്രസിന്റെ ഭീഷണിയ്ക്ക് മുന്നില്‍ പതറുന്നയാളല്ല അമിതാഭ് ബച്ചന്‍. ഷോലെ സിനിമയില്‍ ഗബ്ബര്‍ സിംഗും ബച്ചനെ പേടിപ്പിക്കാന്‍ ശ്രമിച്ചിരുന്നു. അതിനു മുന്നില്‍ പോലും പതറാത്തയാളാണ് അദ്ദേഹം’, സുധീര്‍ പറഞ്ഞു.
ഇന്ധനവില വര്‍ധനവിനെതിരെ പ്രതികരിക്കാത്ത ബോളിവുഡ് നടന്‍മാരുടെ ചിത്രങ്ങളും അവയുടെ ഷൂട്ടിംഗും സംസ്ഥാനത്ത് അനുവദിക്കാന്‍ പാടില്ലെന്ന് മഹാരാഷ്ട്ര കോണ്‍ഗ്രസ് നേതൃത്വം അറിയിച്ചിരുന്നു. അമിതാഭ് ബച്ചന്റെയും അക്ഷയ് കുമാറിന്റെയും പേരെടുത്തു പറഞ്ഞായിരുന്നു ആഹ്വാനം.
‘സാധാരണക്കാരനെ വീണ്ടും ദുരിതത്തിലാഴ്ത്തി ഇന്ധനവില കുത്തനെ ഉയരുകയാണ്. മുന്‍പ്രധാനമന്ത്രി മന്‍മോഹന്‍ സിംഗിന്റെ കാലത്ത് ഇന്ധനവില വര്‍ദ്ധനവിനെതിരെ ശബ്ദമുയര്‍ത്തിയ താരങ്ങളായിരുന്നു അമിതാഭ് ബച്ചനും അക്ഷയ് കുമാറും. എന്നാല്‍ ഇന്ധനവില സര്‍വ്വകാല റെക്കോര്‍ഡിലെത്തിയ ഇക്കാലത്ത് അവര്‍ നിശബ്ദരാണ്. മോദിയുടെ സ്വേച്ഛാധിപത്യ ഭരണത്തിനെതിരെ ശബ്ദമുയര്‍ത്താന്‍ അവര്‍ക്ക് ധൈര്യമില്ല’, കോണ്‍ഗ്രസ് സംസ്ഥാന അധ്യക്ഷന്‍ നാന പട്ടോലെ പറഞ്ഞു.
കേന്ദ്രത്തിന്റെ നടപടികള്‍ക്കെതിരെ ശബ്ദമുയര്‍ത്തിയില്ലെങ്കില്‍ മഹാരാഷ്ട്രയില്‍ അമിതാഭ് ബച്ചന്റെയും അക്ഷയ് കുമാറിന്റെയും ചിത്രങ്ങളുടെ ഷൂട്ടിംഗും പ്രദര്‍ശനവും അനുവദിക്കില്ലെന്നും അദ്ദേഹം പറഞ്ഞിരുന്നു.
രാജ്യത്ത് തുടര്‍ച്ചയായ പതിനൊന്നാം ദിവസവും ഇന്ധനവില വര്‍ദ്ധിച്ചിരിക്കുകയാണ്. പെട്രോള്‍ ലിറ്ററിന് 34 പൈസയും ഡീസലിന് 33 പൈസയുമാണ് ഇന്ന് കൂട്ടിയത്.
രാജസ്ഥാനിലും മധ്യപ്രദേശിലും പെട്രോള്‍ വില ലിറ്ററിന് 100 രൂപ കടന്നിരിക്കുകയാണ്.
പെട്രോള്‍ വിലവര്‍ദ്ധനവിന്റെ ഉത്തരവാദിത്തം മുന്‍ സര്‍ക്കാരുകള്‍ക്കാണെന്നാണ് പ്രധാനമന്ത്രി നരേന്ദ്ര മോദി ഉയര്‍ത്തുന്ന ആരോപണം.
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
Content Highlights: BJP Defends Maharashtra Congress