കൊച്ചി: ഒരിടവേളക്ക് ശേഷം മോഹന്‍ലാല്‍- ബി ഉണ്ണികൃഷ്ണ ടീം വീണ്ടും ഒന്നിക്കുന്നു. പുലി മുരുകന് ശേഷം ഉദയ്കൃഷ്ണ തിരക്കഥ എഴുതുന്ന മോഹന്‍ലാല്‍ ചിത്രം കൂടിയാണിത്.
ചിത്രത്തിന്റെ ഷൂട്ടിംഗ് നവംബറില്‍ ആരംഭിക്കുമെന്ന് ബി.ഉണ്ണികൃഷ്ണന്‍ ഡൂള്‍ന്യൂസിനോട് പറഞ്ഞു. ചിത്രത്തിലെ മറ്റു കഥാപാത്രങ്ങളെ കുറിച്ച് സൂചിപ്പിക്കാന്‍ സമയമായിട്ടില്ലെന്നും അദ്ദേഹം ഡൂള്‍ന്യൂസിനോട് പറഞ്ഞു.
മോഹന്‍ലാലിന്റെ പുതിയ ചിത്രമായ ദൃശ്യം 2 വിന്റെ തൊടുപുഴയിലെ ലൊക്കേഷനില്‍ കഴിഞ്ഞ ദിവസം ബി. ഉണ്ണികൃഷ്ണനും ഉദയ്കൃഷ്ണയും എത്തിയിരുന്നു. മൂവരുമുള്ള ഒരു ഫോട്ടോ ഫേസ്ബുക്കില്‍ പങ്കുവെച്ച് കൊണ്ടായിരുന്നു പുതിയ ചിത്രം ബി. ഉണ്ണികൃഷ്ണന്‍ പ്രഖ്യാപിച്ചത്.
ആക്ഷനും കോമഡിക്കും ഒരേപോലെ പ്രാധാന്യം നല്‍കുന്നതായിരിക്കും പുതിയ ചിത്രമെന്നാണ് ബി ഉണ്ണികൃഷ്ണന്‍ പറഞ്ഞത്. ദൃശ്യം 2നു ശേഷം മോഹന്‍ലാല്‍ അഭിനയിക്കുന്ന ചിത്രംകൂടിയായിരിക്കും ഇത്.
ബി. ഉണ്ണികൃഷ്ണനുവേണ്ടി ആദ്യമായിട്ടാണ് ഉദയ്കൃഷ്ണ തിരക്കഥ എഴുതുന്നത്. മോഹന്‍ലാലിനെവച്ച് ഉണ്ണികൃഷ്ണന്‍ സംവിധാനം ചെയ്യുന്ന അഞ്ചാമത്തെ ചിത്രമാണിത്.
വില്ലനാണ് ഇരുവരും ഒന്നിച്ച അവസാന ചിത്രം. അതേസമയം മമ്മൂട്ടിയെ നായകനാക്കി നവാഗതനായ ജോഫിന്‍ ടി ചാക്കോ കഥയെഴുതി സംവിധാനം ചെയ്യുന്ന ദി പ്രീസ്റ്റ് എന്ന സിനിമ നിര്‍മ്മിക്കുന്നതും ബി ഉണ്ണികൃഷ്ണനാണ് .
ചിത്രത്തില്‍ മഞ്ജു വാര്യരാണ് നായിക. മഞ്ജു വാര്യരും ,മമ്മൂട്ടിയും ആദ്യമായി ഒന്നിച്ച് അഭിനയിക്കുന്നു എന്ന സവിശേഷതയും ഈ ചിത്രത്തിനുണ്ട്. നിഖില വിമലും ,സാനിയ ഇയ്യപ്പനും , ശ്രീനാഥ് ഭാസിയും പ്രധാന കഥാപാത്രങ്ങളാവുന്ന ചിത്രത്തില്‍ കൈതി ,രാക്ഷസന്‍ തുടങ്ങിയ ചിത്രത്തിലൂടെ തിളങ്ങിയ ബേബി മോണിക്കയും പ്രധാന വേഷത്തില്‍ എത്തുന്നുണ്ട്.
ബി ഉണ്ണികൃഷ്ണനും വി എന്‍ ബാബുവും ആന്റോ ജോസഫും,ചേര്‍ന്നാണ് ചിത്രം ഈ നിര്‍മ്മിക്കുന്നത്. അഖില്‍ ജോര്‍ജ് ഛായാഗ്രഹണം നിര്‍വഹിക്കുന്ന ഈ ചിത്രത്തിന്റെ സംഗീത സംവിധാനം രാഹുല്‍ രാജാണ്
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
