കൊച്ചി: മലയാളസിനിമയില്‍ പുതിയ സിനിമാ നിര്‍മാണ കമ്പനി തുടങ്ങുന്ന പൃഥ്വിരാജിന് ആശംസകള്‍ നേര്‍ന്നുകൊണ്ട് ഓഗസ്റ്റ് സിനിമാസ്. മുന്‍പ് ഓഗസ്റ്റ് സിനിമാസില്‍ പങ്കാളിയായിരുന്ന പൃഥ്വിരാജ് അതില്‍നിന്നും വേര്‍പിരിഞ്ഞ ശേഷമാണ് “പൃഥ്വിരാജ് പ്രൊഡക്ഷന്‍സ്” എന്ന പേരില്‍ സ്വന്തമായി നിര്‍മാണ കമ്പനി ആരംഭിക്കുന്നത്.
പൃഥ്വിരാജിന് എല്ലാ ആശംസകളും നേരുന്നു എന്നും സഹകരണങ്ങളുമായി കൂടെയുണ്ടാകും എന്നും അറിയിച്ചുകൊണ്ട് ഓഗസ്റ്റ് സിനിമാസ് പുറത്തിറക്കിയ കുറിപ്പ്-
“ഏറെ അഭിമാനത്തോടെ “പൃഥ്വിരാജ് പ്രൊഡക്ഷന്‍സ്” എന്ന നിര്‍മാണ കമ്പനിയുടെ സമാരംഭ വാര്‍ത്തയെ ഓഗസ്റ്റ് സിനിമാസ് സ്വാഗതം ചെയ്യുന്നു. “ഓഗസ്റ്റ് സിനിമ” എന്ന നാമകരണം മുതല്‍ ചലച്ചിത്ര നിര്‍മാണത്തിന്റെ വിവിധ വശങ്ങളെ പരിചയപ്പെടുത്തിയതും പഠിപ്പിച്ചതും പൃഥ്വിരാജ് എന്ന സഹോദര തുല്യനാണ്.
ആവേശത്തോടെ, സാഹസത്തോടെ പുതിയ ഭാവുകത്വമുള്ള സിനിമകള്‍ ചെയ്യാന്‍ ഓഗസ്റ്റ് സിനിമയ്ക്ക് പ്രചോദനമാകുന്നതിനൊപ്പം പുതിയ കാഴ്ചകളിലേയ്ക്ക് വാതില്‍ തുറക്കുന്ന ഒരു പുതിയ നിര്‍മാണസംരംഭത്തിനു കൂടി തുടക്കം കുറിക്കുമ്പോള്‍ അതിന്റെ ഓരോ ചുവടിലും ശ്വാസത്തിലും ഞങ്ങള്‍ ഒപ്പം ഉണ്ടാകും എന്ന ഉറപ്പ് സമര്‍പ്പിക്കട്ടെ.
ലോകത്തിനു മലയാള സിനിമയോടുള്ള ആദരവും അത്ഭുതവും കൂട്ടുന്ന സിനിമകള്‍ സൃഷ്ടിക്കാന്‍ പൃഥ്വിരാജ് പ്രൊഡക്ഷന്‍സിനൊപ്പം പിന്തുണയായി എന്നും അദ്ദേഹം തിരികൊളുത്തിയ ഓഗസ്റ്റ് സിനിമയും ഉണ്ടാകും.
ഹൃദയം നിറഞ്ഞ ആശംസകളോടെ ഓഗസ്റ്റ് സിനിമ ഫാമിലി.”
സന്തോഷ് ശിവന്‍, ഷാജി നടേശന്‍, ആര്യ എന്നിവരാണ് ഓഗസ്റ്റ് സിനിമയുടെ മറ്റ് അംഗങ്ങള്‍.