സ്പാനിഷ് വമ്പന്‍മാരായ അത്‌ലറ്റിക്കോ മാഡ്രിഡ് വീണ്ടും ഇന്ത്യന്‍ ഫുട്‌ബോളിലേക്ക് മടങ്ങിയെത്തുന്നു. ഐ ലീഗിലെ പുതിയ ക്ലബ്ബായ ഇന്റര്‍ കാശി എഫ്.സിക്കൊപ്പമാണ് അത്‌ലറ്റിക്കോ മാഡ്രിഡ് വീണ്ടും ഇന്ത്യന്‍ ഭൂമികയിലേക്ക് മടങ്ങിയെത്തുന്നത്.
അത്‌ലറ്റിക്കോ മാഡ്രിഡിനൊപ്പം തന്നെ അന്‍ഡോറന്‍ ലീഗ് ജേതാക്കളായ ഇന്റര്‍ എസ്‌കലേഡ്‌സും മുന്‍ ബാഴ്‌സലോണ താരം ജെറാര്‍ഡ് പിക്വയുടെ ഉടമസ്ഥതയിലുള്ള എഫ്.സി അന്‍ഡാറക്കും ഇന്റര്‍ കാശി എഫ്.സിയില്‍ പങ്കാളിത്തമുണ്ട്. സ്പാനിഷ് രണ്ടാം ഡിവിഷന്‍ (സെന്‍ഗുണ്‍ഡ) ക്ലബ്ബാണ് എഫ്.സി അന്‍ഡാറ.
ഉത്തര്‍പ്രദേശില്‍ നിന്നുള്ള ആദ്യ പ്രൊഫഷണല്‍ ഫുട്‌ബോള്‍ ടീം എന്ന പ്രത്യേകതയും ഇന്റര്‍ കാശിക്കുണ്ട്. വാരാണസി ആസ്ഥാനമാക്കിയാണ് ക്ലബ്ബ് രൂപീകരിച്ചിരിക്കുന്നത്. കൊല്‍ക്കത്ത ആസ്ഥാനമാക്കി പ്രവര്‍ത്തിക്കുന്ന ആര്‍.ഡി.ബി ഗ്രൂപ്പാണ് ഇന്റര്‍ കാശിയുടെ ഉടമകള്‍.
Collaboration agreement with the @InterKashi project, the First National-Level Football Club from Uttar Pradesh in India, whose headquarters will be in Varanasi.
ഉത്തര്‍പ്രദേശില്‍ നിന്നുള്ള ആദ്യ പ്രൊഫഷണല്‍ ഫുട്‌ബോള്‍ ക്ലബ്ബായ ഇന്റര്‍ കാശിയുമായി സഹകരിക്കാന്‍ ക്ലബ്ബിന്റെ ഉടമകളുമായി ധാരണയിലെത്തിയിട്ടുണ്ടെന്ന് അത്‌ലറ്റിക്കോ മാഡ്രിഡ് പ്രസ്താവനയിലൂടെ അറിയിച്ചിരുന്നു.
കോര്‍പ്പറേറ്റ് എന്‍ട്രി വഴി നേരിട്ട് ഐ ലീഗിലേക്ക് പ്രവേശിക്കാനാണ് ക്ലബ്ബിന്റെ നീക്കം. ഇതിനായുള്ള നടപടികളും ഇന്റര്‍ കാശി ആരംഭിച്ചു കഴിഞ്ഞു. അടുത്ത സീസണില്‍ ഐ ലീഗ് കളിക്കാന്‍ സാധിക്കുമെന്നാണ് ക്ലബ്ബ് അധികൃതര്‍ വ്യക്തമാക്കുന്നത്.
