അസം കൽക്കരി ഖനി ദുരന്തം; മൂന്ന് തൊഴിലാളികൾക്ക് ദാരുണാന്ത്യം, രക്ഷാപ്രവർത്തനത്തിനായി മുങ്ങൽ വിദഗ്ധരെ വിന്യസിച്ച് സർക്കാർ

ദിസ്പൂര്‍: അസം കൽക്കരി ഖനി ദുരന്തത്തിൽ മൂന്ന് തൊഴിലാളികൾ കൊല്ലപ്പെട്ടതായി റിപ്പോർട്ട്. മൂന്ന് മൃതദേഹങ്ങൾ രക്ഷാപ്രവർത്തകർക്ക് കണ്ടെത്താനായെങ്കിയിലും ഇതുവരെ പുറത്തെടുക്കാൻ സാധിച്ചിട്ടില്ലെന്ന് പ്രാദേശിക ഭരണകൂടം പറഞ്ഞു. ഖനിയിൽ കുടുങ്ങിക്കിടക്കുന്ന ബാക്കിയുള്ളവരെ രക്ഷിക്കാനുള്ള ശ്രമം പുരോഗമിച്ചുകൊണ്ടിരിക്കുകയാണ്. അസമിലെ ദിമാ ഹസാവോ ജില്ലയിലെ ഉമറാങ്‌സോയിൽ ഏകദേശം മുന്നൂറടിയോളം ആഴമുള്ള ഖനിയിലാണ് തൊഴിലാളികള്‍ കുടുങ്ങികിടക്കുന്നത്.

ക്വാറിക്കുള്ളിലെ ജലനിരപ്പ് 100 അടിയോളം ഉയർന്നതിനാൽ  ഖനിയിൽ കുടുങ്ങിയ ഒമ്പത് തൊഴിലാളികളെ രക്ഷിക്കാൻ നാവികസേനാ മുങ്ങൽ വിദഗ്ധരെ ആവശ്യപ്പെട്ടിട്ടുണ്ടെന്ന് അസം മുഖ്യമന്ത്രി ഹിമന്ത ബിശ്വ ശർമ്മ ചൊവ്വാഴ്ച പറഞ്ഞു.

രക്ഷാപ്രവർത്തനം തുടരുന്നുണ്ടെങ്കിലും ഇതുവരെ ഒരു തൊഴിലാളിയെയും ക്വാറിയിൽ നിന്ന് പുറത്തെടുത്തിട്ടില്ലെന്ന് ജില്ലാ ഉദ്യോഗസ്ഥൻ പറഞ്ഞു.

ഒമ്പത് തൊഴിലാളികളെ രക്ഷിക്കാൻ കരസേനാ ഉദ്യോഗസ്ഥർ രക്ഷാപ്രവർത്തനത്തിൽ ഏർപ്പെട്ടിട്ടുണ്ടെന്നും അവശ്യ ഉപകരണങ്ങളുമായി സജ്ജീകരിച്ച മുങ്ങൽ വിദഗ്ധർ, സാപ്പർമാർ എന്നിവരടങ്ങുന്ന ദുരിതാശ്വാസ ടാസ്‌ക് ഫോഴ്‌സും ഉമ്രാങ്‌സോയിലെ സ്ഥലത്ത് എത്തിയതായി പ്രതിരോധ വക്താവ് പറഞ്ഞു.

‘ഇന്ത്യൻ ആർമിയിലെയും അസം റൈഫിൾസിലെയും ഉപകരണങ്ങൾ, മുങ്ങൽ വിദഗ്ധർ, മെഡിക്കൽ ടീമുകൾ എന്നിവയുള്ള എഞ്ചിനീയർമാരുടെ ടാസ്‌ക് ഫോഴ്‌സ് രക്ഷാപ്രവർത്തനങ്ങളിൽ പങ്കുചേർന്നു,’ അദ്ദേഹം പറഞ്ഞു.

കുടുങ്ങിക്കിടക്കുന്ന ആളുകളെ രക്ഷിക്കാൻ സിവിൽ അഡ്മിനിസ്ട്രേഷനുമായി അടുത്ത ഏകോപനത്തോടെ എല്ലാ ശ്രമങ്ങളും നടക്കുന്നുണ്ടെന്ന് മറ്റൊരു ഉദ്യോഗസ്ഥൻ പറഞ്ഞു.

ഉദ്യോഗസ്ഥർ പറയുന്നതനുസരിച്ച്, മലയോര ജില്ലയിലെ ഉംറംഗ്ഷൂ മേഖലയിലെ ടിൻ കിലോ എന്ന സ്ഥലത്ത് സംസ്ഥാന സർക്കാരിൻ്റെ മൈൻസ് ആൻഡ് മിനറൽസ് വകുപ്പ് പ്രവർത്തിക്കുന്ന കൽക്കരി ഖനിക്കുള്ളിൽ തിങ്കളാഴ്ച രാവിലെയോടെ ജോലിക്ക് പോയ തൊഴിലാളികൾ വെള്ളപ്പൊക്കം മൂലം കുടുങ്ങുകയായിരുന്നു.

നേപ്പാളിലെ ഉദയാപൂർ ജില്ലയിൽ നിന്നുള്ള ഗംഗാ ബഹാദൂർ ശ്രേത്, പശ്ചിമ ബംഗാളിലെ ജൽപായ്ഗുരി ജില്ലയിൽ നിന്നുള്ള സഞ്ജിത് സർക്കാർ എന്നിവരും കാണാതായവരിൽ ഉൾപ്പെടുന്നുവെന്ന് ശർമ പറഞ്ഞു. ബാക്കി തൊഴിലാളികൾ അസമിലെ ദരാംഗ്, കൊക്രജാർ, ദിമ ഹസാവോ, സോനിത്പൂർ ജില്ലകളിൽ ഖനിത്തൊഴിലാളികളായ ഗംഗാ ബഹാദൂർ ശ്രേത്, ഹുസൈൻ അലി, ജാക്കിർ ഹുസൈൻ, സർപ്പ ബർമാൻ, മുസ്തഫ സെയ്ഖ്, ഖുസി മോഹൻ റായ്, സഞ്ജിത് സർക്കാർ, ലിജൻ മഗർ, ശരത് ഗോയാരി എന്നിവരാണ്.

കൽക്കരി ഖനി നിയമവിരുദ്ധമാണെന്നും അതിൻ്റെ ഉൾഭാഗത്ത് രഹസ്യമായാണ് ഖനനം നടത്തുന്നതെന്നും വൃത്തങ്ങൾ പറഞ്ഞു.
സമാനമായ അപകടങ്ങൾ അയൽസംസ്ഥാനമായ മേഘാലയയിൽ മുമ്പ് നടന്നിട്ടുണ്ട്, അതിൽ നിരവധി തൊഴിലാളികൾ മരിച്ചു. ഇത്തരം സംഭവങ്ങൾ ദേശീയ ഹരിത ട്രൈബ്യൂണലിൻ്റെ ശ്രദ്ധയിൽ പെടുകയും അത്തരം ഖനനം നിരോധിക്കുകയും ചെയ്തിരുന്നു.

Content Highlight: At least 9 labourers trapped in coal mine, army team reaches Assam’s Umrangso