ഗാന്ധിജിയുമായി ബന്ധപ്പെട്ടതെല്ലാം ഇല്ലാതാക്കാനുള്ള അജണ്ടയാണിത്; സബര്‍മതി ആശ്രമം മ്യൂസിയമാക്കുന്നതിനെതിരെ അശോക് ഗെലോട്ട്
ഡൂള്‍ന്യൂസ് ഡെസ്‌ക്
Monday, 9th August 2021, 6:46 pm
ജയ്പൂര്‍: ഗുജറാത്തിലെ സബര്‍മതി ആശ്രമം പുനര്‍ നിര്‍മ്മിച്ച് മ്യൂസിയമാക്കാനുള്ള കേന്ദ്ര നീക്കത്തെ എതിര്‍ത്ത് രാജസ്ഥാന്‍ മുഖ്യമന്ത്രി അശോക് ഗെലോട്ട്. കേന്ദ്രത്തിന്റെ നടപടി ഞെട്ടിപ്പിക്കുന്നതാണെന്ന് ഗെലോട്ട് പറഞ്ഞു.
ആശ്രമം പൊളിച്ച് മാറ്റുന്നത് മഹാത്മാ ഗാന്ധിയെ അപമാനിക്കുന്നതിന് തുല്യമാണെന്നും ഗെലോട്ട് കൂട്ടിച്ചേര്‍ത്തു.
‘കേന്ദ്രസര്‍ക്കാരിന്റെ ഈ തീരുമാനം അക്ഷരാര്‍ത്ഥത്തില്‍ എന്നെ ഞെട്ടിച്ചിരിക്കുന്നു. ആവശ്യമില്ലാത്ത പണിയാണിത്. കേന്ദ്രം ഈ തീരുമാനത്തില്‍ നിന്ന് പിന്‍മാറണം.
പ്രധാനമന്ത്രി നരേന്ദ്ര മോദി വിഷയത്തില്‍ അടിയന്തര ഇടപെടല്‍ നടത്തണം. ലാളിത്യവും സാഹോദര്യവും ഒത്തുച്ചേരുന്നയിടമാണ് സബര്‍മതി ആശ്രമം. അതുകൊണ്ടുതന്നെയാണ് അവിടം ആശ്രമം എന്നറിയപ്പെടുന്നത്. മ്യൂസിയം ആക്കാനുള്ള സ്ഥലമല്ല അത്,’ ഗെലോട്ട് പറഞ്ഞു.
