അഡ്‌ലെയ്ഡ്: രണ്ടാം ആഷസ് ടെസ്റ്റിലും ഓസ്ട്രേലിയ പിടിമുറുക്കുന്നു. ഷോണ്‍ മാര്‍ഷിന്റെ സെഞ്ച്വറിയുടെ പിന്‍ബലത്തില്‍ എട്ടു വിക്കറ്റിന് 442 റണ്‍സെടുത്ത കംഗാരുപ്പട ആദ്യ ഇന്നിങ്‌സ് ഡിക്ലയേഡ് ചെയ്തു. 231 പന്തില്‍ 126 റണ്‍സുമായി മാര്‍ഷ് പുറത്താകാതെ നിന്നു.
നാല് വിക്കറ്റ് നഷ്ടത്തില്‍ 209 റണ്‍സെന്ന നിലയില്‍ രണ്ടാം ദിനം കളി തുടങ്ങിയ ഓസ്ട്രേലിയ മാര്‍ഷ്, ടിം പെയ്നെ, പാറ്റ് കുമ്മിന്‍സ് എന്നിവരുടെ പ്രകടനത്തിന്റെ പിന്‍ബലത്തിലാണ് മികച്ച ടോട്ടല്‍പടുത്തുയര്‍ത്തിയത്. ടിം പെയ്ന്‍ 57 ഉം കുമ്മിന്‍സ് 44 ഉം റണ്‍സെടുത്ത് മാര്‍ഷിനു പിന്തുണ നല്‍കി.
മറുപടി ബാറ്റിങ്ങിനിറങ്ങിയ ഇംഗ്ലണ്ടിന് 29 റണ്‍സെടുക്കുന്നതിനിടയില്‍ തന്നെ ആദ്യ വിക്കറ്റ് നഷ്ടമായി. ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഓസീസിനായി ഡേവിഡ് വാര്‍ണര്‍ 47 ഉം, ഉസ്മാന്‍ ഖ്വാജ 53 ഉം, ക്യാപ്റ്റന്‍ സ്റ്റീവ് സ്മിത്ത് 40 ഉം റണ്‍സ് നേടിയിരുന്നു.
നേരത്തെ ആഷസിലെ ആദ്യ ടെസ്റ്റില്‍ ഓസ്ട്രേലിയ പത്ത് വിക്കറ്റിന് വിജയിച്ചിരുന്നു.