മുംബൈ: രാജ്യത്ത് കൊവിഡ് പടര്‍ന്നുപിടിക്കുന്ന സാഹചര്യത്തില്‍ വെന്റിലേറ്ററുകള്‍ നിര്‍മ്മിച്ച് നല്‍കാനുള്ള ശ്രമത്തിലാണ് രാജ്യത്തെ പ്രമുഖ വാഹന നിര്‍മ്മാതാക്കളായ മാരുതി. വെന്റിലേറ്ററുകള്‍ നിര്‍മ്മിച്ച് തരാമോ എന്നാവശ്യപ്പെട്ട് സര്‍ക്കാര്‍ കമ്പനിയെ സമീപിച്ചിരുന്നു. തുടര്‍ന്നാണ് ഇതിന്റെ സാധ്യത കമ്പനിയിലെ വിദഗ്ധര്‍ പഠിക്കുകയാണെന്ന് മാരുതി അറിയിച്ചിരിക്കുന്നത്.
‘ഒരു ഓട്ടോമൊബൈല്‍ കമ്പനിയെ സംബന്ധിച്ചിടത്തോളെ വെന്റിലേറ്ററുകള്‍ നിര്‍മ്മിക്കുക എന്നത് ഏറെ ശ്രമകരമായ ദൗത്യമാണ്. വെന്റിലേറ്ററുകള്‍ നിര്‍മ്മിച്ച് നല്‍കാന്‍ കഴിയുമോ എന്ന ആവശ്യവുമായി കഴിഞ്ഞ ദിവസമാണ് അധികൃതര്‍ ഞങ്ങളെ സമീപിച്ചത്. ഇത് പ്രാവര്‍ത്തികമാക്കാന്‍ കഴിയുമോ എന്നതാണ് ഞങ്ങള്‍ നോക്കുന്നത്. വെന്റിലേറ്ററിനെക്കുറിച്ചും അതിന്റെ സാങ്കേതിക വിദ്യയെക്കുറിച്ചും എന്തൊക്കെയാണ് ആവശ്യം എന്നതിനെക്കുറിച്ചും മാരുതി സുസുക്കിയിലെ വിദഗ്ധര്‍ പഠിച്ചുകൊണ്ടിരിക്കുകയാണ്’, കമ്പനിയുടെ ചെയര്‍മാന്‍ ബി.സി ഭാര്‍ഗവ പറഞ്ഞു.
ഒന്നോ രണ്ടോ ദിവസത്തിനകം ഇക്കാര്യത്തില്‍ അന്തിമ ധാരണയാവുമെന്നും എന്ത് ചെയ്യാന്‍ കഴിയും, എന്ത് കഴിയില്ല എന്ന് സര്‍ക്കാരിനോട് പറയാന്‍ കഴിയുമെന്നും അദ്ദേഹം കൂട്ടിച്ചേര്‍ത്തു.
