ഫുട്‌ബോളിനോടുള്ള ആരാധന മൂത്ത് തന്റെ മകനു ആഴ്‌സണിലന്റെ സൂപ്പര്‍ താരം മെസ്യൂട്ട് ഓസിലിന്റെ പേരിട്ട മഞ്ചേരിക്കാരന്‍ ഇന്‍സമാമിനെക്കുറിച്ച് കഴിഞ്ഞദിവസം വാര്‍ത്ത പുറത്ത വന്നിരുന്നു. ഇംഗ്ലീഷ് പ്രീമിയര്‍ ലീഗ് ക്ലബ്ബായ ആഴ്സണല് തയ്യാറാക്കിയ വീഡിയോ സഹിതമായിരുന്നു മാധ്യമങ്ങളില്‍ മലപ്പുറം കാരന്റെ ജീവിതം വാര്‍ത്തയായത്.
എന്നാലിതാ ഇപ്പോള്‍ തങ്ങളുടെ പ്രിയ ആരാധകന്റെ വീഡിയോ ഷെയര്‍ ചെയ്ത് സ്‌നേഹം അറിയിച്ചിരിക്കുകയാണ് ഗണ്ണേഴ്‌സിന്റെ സൂപ്പര്‍ താരം മെസ്യൂട്ട് ഓസില്‍. തന്റെ ഫേസ്ബുക്ക് പേജിലൂടെയാണ് ഓസില്‍ ഇന്‍സമാമിന്റെ “കളിഭ്രാന്തി”നെക്കുറിച്ചുള്ള വീഡിയോ ഷെയര്‍ ചെയ്തിരിക്കുന്നത്.
“മെഹദ് ഓസില്‍ എന്നു കുട്ടിക്ക് പേരിട്ടിരിക്കുന്നത് എന്നെ സംബന്ധിച്ചിടത്തോളം വലിയ ബഹുമതിയാണ്. ഇന്ത്യയിലേക്കും മെഹദ് ഓസിലിനും എന്റെ എല്ലാ ആശംസകളും അറിയിക്കുന്നു.” ഇന്‍സമാമിനെക്കുറിച്ചുള്ള ആഴ്‌സണലിന്റെ വീഡിയോ ഷെയര്‍ ചെയ്ത് കൊണ്ട് ഓസില്‍ എഫ്.ബിയില്‍ കുറിച്ചു.
ഭാര്യ ഫിദ സനം ഗര്‍ഭിണിയായപ്പോള്‍ത്തന്നെ ആണ്‍കുട്ടിയാണ് ജനിക്കുന്നതെങ്കില്‍ ഒരു ആഴ്സണല് താരത്തിന്റെ പേര് നല്‍കാന്‍ താന്‍ തീരുമാനിച്ചിരുന്നെന്ന് ഇന്‍സമാമം വീഡിയോയില്‍ പറയുന്നുണ്ട്.
മകന് ആഴ്സണല് പരിശീലകന്‍ ആഴ്സന്‍ വെങറുടെ പേര് നല്‍കാനാണ് കൂട്ടുകാര്‍ നിര്‍ദ്ദേശിച്ചതെങ്കിലും പ്രിയ താരം മെസൂട്ട് ഓസിലിന്റെ പേരു നല്‍കാനാണ് താന്‍ തീരുമാനിച്ചതെന്നും ഇന്‍സമാമം വീഡിയോയില്‍ പറയുന്നു.