നിര്‍ണായക മത്സരത്തിന് മുമ്പ് മുംബൈക്ക് തിരിച്ചടി, സൂപ്പര്‍താരത്തെ പട്ടി കടിച്ചു
സ്പോര്‍ട്സ് ഡെസ്‌ക്
Tuesday, 16th May 2023, 2:32 pm
സച്ചിന്‍ ടെണ്ടുല്‍ക്കറുടെ മകനും മുംബൈ ഇന്ത്യന്‍സിന്റെ യുവപേസറുമായ അര്‍ജുന്‍ ടെണ്ടുല്‍ക്കര്‍ക്ക് പട്ടി കടിയേറ്റു. ഇന്നത്തെ ലഖ്‌നൗ സൂപ്പര്‍ ജയന്റ്‌സിനെതിരായ മത്സരത്തിന് മുന്നോടിയായാണ് ഈ വിവരം താരം തന്നെ പങ്കുവെച്ചത്. ലഖ്‌നൗ താരങ്ങളുമായുള്ള ഗ്രൗണ്ടിലെ കൂടിക്കാഴ്ചക്കിടെയാണ് അര്‍ജുന്‍ കൈക്ക് കടിയേറ്റ വിവരം അറിയിച്ചത്. വിരലിന് മുറിവുള്ളതിനാല്‍ ഇന്ന് പരിശീലന സെഷനില്‍ താരത്തിന് ബൗള്‍ ചെയ്യാനായിട്ടില്ല.
ലഖ്‌നൗ താരങ്ങളായ യുധ്‌വീര്‍ സിങ്ങുമായും മൊഹ്‌സിനുമായി നടത്തുന്ന കുശലാന്വേഷണങ്ങള്‍ക്കിടെയാണ്, ഒരു ദിവസം മുമ്പ് തന്റെ ഇടത് കൈയില്‍ പട്ടി കടിച്ചെന്നും മുറിവുണ്ടെന്നും താരം വെളിപ്പെടുത്തിയത്. എന്നാല്‍ കാര്യമായ പരിക്കുകളൊന്നുമില്ലെന്നും മറ്റ് ആരോഗ്യ പ്രശ്‌നങ്ങളില്ലെന്നും അര്‍ജുന്‍ പറയുന്നത് ലഖ്‌നൗ ടീം പങ്കുവെച്ച ട്വിറ്റര്‍ വീഡിയോയില്‍ തന്നെ കാണാം.
