ഇന്ന് മലയാളികൾക്കിടയിൽ ഏറെ സ്വീകാര്യനായ താര പുത്രനാണ് അർജുൻ അശോകൻ. ചെറിയ ക്യാരക്ടർ റോളുകളിലൂടെ തന്റെ സിനിമ ആരംഭിച്ച അർജുൻ അശോകൻ ഇന്ന് മലയാളത്തിൽ തിരക്കുള്ള ഒരു യുവനടനാണ്.
ഈ വർഷമിറങ്ങി വലിയ ചർച്ചയായി മാറിയ മമ്മൂട്ടി ചിത്രം ഭ്രമയുഗത്തിൽ ശ്രദ്ധേയമായ കഥാപാത്രത്തെ അവതരിപ്പിക്കാൻ അർജുൻ അശോകന് സാധിച്ചിരുന്നു. മുമ്പ് ഉണ്ട എന്ന ചിത്രത്തിൽ മമ്മൂട്ടിയോടൊപ്പം അർജുൻ അശോകൻ അഭിനയിച്ചിട്ടുണ്ട്. മമ്മൂട്ടി ഗസ്റ്റ് റോളിൽ എത്തി ഈ വർഷത്തെ വലിയ വിജയങ്ങളിൽ ഒന്നായി മാറിയ എബ്രഹാം ഓസ്‌ലറിലും താരം ഭാഗമായിരുന്നു.
ഓസ്‌ലറിൽ അഭിനയിക്കുമ്പോൾ ചിത്രത്തിനൊരു രണ്ടാംഭാഗമുണ്ടാവുമെന്ന് സംവിധായകൻ മിഥുൻ മാനുവൽ പറഞ്ഞിരുന്നുവെന്നും അതിൽ വില്ലനായി അഭിനയിക്കാൻ തന്നെ വിളിക്കുമെന്ന് പറഞ്ഞെന്നും അർജുൻ പറയുന്നു. താൻ ഏറ്റവും കൂടുതൽ റിസേർച്ച് നടത്തി അഭിനയിച്ച കഥാപാത്രമാണ് ഓസ്‌ലറിലേതെന്നും അർജുൻ അശോകൻ പറഞ്ഞു.
‘ഓസ്‌ലർ ചെയ്യുന്ന സമയത്ത് മിഥുൻ ചേട്ടൻ പറഞ്ഞത് ഇതിന് സെക്കന്റ്‌ പാർട്ട്‌ ഉണ്ടാവുമെന്നാണ്. അതിൽ നീയായിരിക്കും വില്ലനെന്ന് എന്നോട് ജസ്റ്റ്‌ പറഞ്ഞിരുന്നു. പിന്നെ പടം ഹിറ്റായപ്പോൾ ഞാൻ മിഥുനേട്ടനെ വിളിച്ചു. ചേട്ടാ സെക്കന്റ്‌ പാർട്ട്‌ എപ്പോഴാണെന്ന് ഞാൻ ചോദിച്ചു. അത് എന്തായാലും ഉണ്ടാവും, നിന്നോട് പറയുമെന്നാണ് പുള്ളി പറഞ്ഞത്. അപ്പോഴേക്കും ആട് എന്ന സിനിമയുടെ തിരക്കിലായി പുള്ളി.
എന്തായാലും ഉണ്ടാവുമായിരിക്കും. സത്യം പറഞ്ഞാൽ ഓസ്‌ലറിന് വേണ്ടി ഒരു ദിവസത്തെ ഷൂട്ട് മാത്രമേ എനിക്കുണ്ടായിരുന്നുള്ളൂ. ഒരു വൈകുന്നേരം പോയിട്ട് രാത്രിയാവുമ്പോൾ കഴിഞ്ഞു. ഞാൻ ഇത്രയും പടങ്ങൾ ചെയ്തിട്ടുണ്ടെങ്കിലും ഒരു റിസേർച്ച് നടത്തി നന്നായി പഠിച്ച് ചെയ്യുന്ന ഒരു കഥാപാത്രം ഓസ്‌ലറിലെ വേഷമായിരുന്നു.
കാരണം ട്രാക്കിലാവാനുള്ള സമയം എനിക്കില്ലായിരുന്നു. അതുകൊണ്ട് ഒരാഴ്ച്ചയോളം പണിയെടുത്താണ് ഞാൻ ആ കഥാപാത്രം ചെയ്തത്. അത് നന്നായി വർക്കായതിൽ ഒരുപാട് സന്തോഷം തോന്നി,’അർജുൻ അശോകൻ പറയുന്നു.
അതേസമയം ബസൂക്കയാണ് മമ്മൂട്ടിയുടേതായി അടുത്തതായി പുറത്തിറങ്ങാനുള്ള ചിത്രം. ഗൗതം വാസുദേവ് മേനോൻ ആദ്യമായി മലയാളത്തിൽ സംവിധാനം ചെയ്യുന്ന ഡൊമിനിക് ആൻഡ് ലേഡീസ് പേഴ്‌സ് , മമ്മൂട്ടി – വിനായകൻ ചിത്രം, മഹേഷ് നാരായണൻ ചിത്രം തുടങ്ങി ഒരുപിടി മികച്ച സിനിമകൾ മമ്മൂട്ടിയുടേതായി പുറത്തിറങ്ങാനുണ്ട്.
Content Highlight: Arjun Ashokan About Experience In Abraham Ozler Movie