കഴുത്തറുത്ത് അനുഷ്‌ക ഷെട്ടി; ത്രില്ലടിപ്പിക്കുന്ന ഗ്ലിംസ് വീഡിയോയുമായി 'ഘാട്ടി'

ക്രിയേറ്റീവ് ഡയറക്ടര്‍ ക്രിഷ് ജാഗര്‍ലമുഡിയുമായി അനുഷ്‌ക ഷെട്ടി വീണ്ടും ഒന്നിക്കുന്ന ചിത്രമാണ് ‘ ഘാട്ടി’. ചിത്രത്തിന്റെ ഏറ്റവും പുതിയ ഫസ്റ്റ് ലുക്ക് പോസ്റ്റര്‍ ഇന്ന് പുറത്തിറങ്ങിയിരുന്നു. ഇപ്പോള്‍ ഗ്ലിംസ് വീഡിയോയുമായി എത്തിയിരിക്കുകയാണ് അണിയറപ്രവര്‍ത്തകര്‍. അനുഷ്‌ക ഷെട്ടിയുടെ ജന്മദിനം പ്രമാണിച്ചാണ് ഫസ്റ്റ് ലുക്ക് പോസ്റ്ററും ഗ്ലിംസും റിലീസ് ചെയ്തിരിക്കുന്നത്.

യു.വി. ക്രിയേഷന്‍സ് അവതരിപ്പിക്കുന്ന ചിത്രം നിര്‍മിക്കുന്നത് രാജീവ് റെഡ്ഡിയും സായ് ബാബു ജാഗര്‍ലമുഡിയും ചേര്‍ന്നാണ്. ബ്ലോക്ക്ബസ്റ്റര്‍ ഹിറ്റായ ‘വേദം’ എന്ന ചിത്രത്തിന് ശേഷം അനുഷ്‌കയും കൃഷും ഒന്നിക്കുന്ന ഈ ചിത്രം യു.വി. ക്രിയേഷന്‍സിന്റെ ബാനറില്‍ അനുഷ്‌ക അഭിനയിക്കുന്ന നാലാമത്തെ ചിത്രം കൂടിയാണ്.

ഗ്ലിംസ് വീഡിയോയില്‍ ഒരാളുടെ കഴുത്തറക്കുന്ന അനുഷ്‌കയെയാണ് കാണിക്കുന്നത്. ഫസ്റ്റ് ലുക്ക് പോസ്റ്ററില്‍, തലയില്‍ നിന്നും കൈകളില്‍ നിന്നും രക്തം ചൊരിയുന്ന രൂപത്തില്‍ നടിയുടെ അതിശയകരവും ക്രൂരവുമായ ഒരു അവതാരത്തെയാണ് കാണിക്കുന്നത്. ഒരേ സമയം ഗൗരവപൂര്‍ണ്ണവും ധീരവുമായ രൂപത്തിലാണ് അനുഷ്‌കയുടെ കഥാപാത്രത്തെ ഒരുക്കിയിരിക്കുന്നത്.

നെറ്റിയിലെ ബിന്ദിയും കണ്ണുനീര്‍ നിറഞ്ഞ കണ്ണുകളും രണ്ട് മൂക്കുത്തികളും അണിഞ്ഞ രൂപത്തില്‍ ചുരുട്ട് വലിച്ചു കൊണ്ടാണ് അനുഷ്‌കയുടെ കഥാപാത്രത്തെ പോസ്റ്ററില്‍ കാണാന്‍ സാധിക്കുന്നത്. ജീവിതത്തിലെ ക്രൂരമായ യാഥാര്‍ത്ഥ്യത്തില്‍ നിന്ന് ഒഴിഞ്ഞുമാറാത്ത ഒരു ചിത്രമായിരിക്കും ഘാട്ടിയെന്നു പോസ്റ്റര്‍ സൂചിപ്പിക്കുന്നുണ്ട്.

അതിജീവനത്തിന് പ്രതിരോധശേഷി മാത്രമല്ല, ഒരു പ്രത്യേക തരം ക്രൂരതയും ആവശ്യമാണ് എന്ന ടോണില്‍ ഒരുക്കിയിരിക്കുന്ന പോസ്റ്റര്‍, വൈകാരികവും തീവ്രവും ഒരുപക്ഷേ ദാരുണവുമായ ഒരു യാത്രയ്ക്ക് കൂടിയാണ് ഒരുങ്ങുന്നതെന്ന സൂചനയും പ്രേക്ഷകര്‍ക്ക് നല്‍കുന്നു.

‘വിക്ടിം, ക്രിമിനല്‍, ലെജന്‍ഡ്’ എന്നാണ് പോസ്റ്ററില്‍ ഉപയോഗിച്ചിരിക്കുന്ന ടാഗ്ലൈന്‍. ഒരു വമ്പന്‍ ആക്ഷന്‍ ത്രില്ലറായി ഒരുക്കുന്ന ചിത്രം ഇപ്പോള്‍ നിര്‍മാണത്തിന്റെ അവസാന ഘട്ടത്തിലാണ്. ഉയര്‍ന്ന ബജറ്റും മികച്ച സാങ്കേതിക നിലവാരവുമുള്ള വലിയ കാന്‍വാസില്‍ ഒരുക്കുന്ന ചിത്രം തെലുങ്ക്, തമിഴ്, കന്നഡ, മലയാളം, ഹിന്ദി ഭാഷകളിലാണ് പുറത്തിറങ്ങുന്നത്.

സംവിധാനം, തിരക്കഥ – ക്രിഷ് ജാഗര്‍ലമുഡി, നിര്‍മാതാക്കള്‍ – രാജീവ് റെഡ്ഡി, സായ് ബാബു ജാഗര്‍ലമുഡി, അവതരണം – യു.വി. ക്രിയേഷന്‍സ്, ബാനര്‍ – ഫസ്റ്റ് ഫ്രെയിം എന്റര്‍ടെയ്ന്‍മെന്റ്, ഛായാഗ്രഹണം – മനോജ് റെഡ്ഡി കടസാനി, സംഗീത സംവിധായകന്‍ – നാഗവെല്ലി വിദ്യാ സാഗര്‍, എഡിറ്റര്‍ – ചാണക്യ റെഡ്ഡി തുരുപ്പു, കലാസംവിധായകന്‍ – തോട്ട തരണി, സംഭാഷണങ്ങള്‍ – സായ് മാധവ് ബുറ, കഥ – ചിന്താകിന്ദി ശ്രീനിവാസ് റാവു, സംഘട്ടനം – രാം കൃഷ്ണന്‍, പബ്ലിസിറ്റി ഡിസൈനര്‍ – അനില്‍- ഭാനു, മാര്‍ക്കറ്റിങ് – ഫസ്റ്റ് ഷോ, പി.ആര്‍.ഒ. – ശബരി.

Content Highlight: Anushka Shetty’s Ghaati Movie Glimps Video Out