ഒ.ടി.ടി റിലീസിന് ഒരുങ്ങി അനുഷ്‌ക ഷെട്ടിയുടെ 'നിശ്ശബ്ദ'വും; റിലീസ് ഡേറ്റ് പ്രഖ്യാപിച്ച് ആമസോണ്‍ പ്രൈം
എന്റര്‍ടെയിന്‍മെന്റ് ഡെസ്‌ക്
Friday, 18th September 2020, 11:27 pm
കൊച്ചി: ഒ.ടി.ടി റിലീസിന് ഒരുങ്ങി അനുഷ്‌ക ഷെട്ടിയുടെ ‘നിശ്ശബ്ദ’വും ആമസോണ്‍ പ്രൈമിലൂടെയാണ് ചിത്രം റിലീസ് ചെയ്യുന്നത്. 13 വര്‍ഷങ്ങള്‍ക്ക് ശേഷം നടന്‍ മാധവനും അനുഷ്‌ക ഷെട്ടിയും ഒന്നിക്കുന്ന ചിത്രം കൂടിയാണ് ‘നിശ്ശബ്ദം’.
ബാഗമതിക്ക് ശേഷം പുറത്തിറങ്ങുന്ന അനുഷ്‌കയുടെ ഹൊറര്‍ ചിത്രമാണിതെന്ന പ്രത്യേകത കൂടി ചിത്രത്തിന് ഉണ്ട്. കാഴ്ചവൈകല്യമുള്ള ആന്റണി എന്ന സെലിബ്രിറ്റി ഗായകനായിട്ടാണ് മാധവന്‍ ചിത്രത്തില്‍ എത്തുന്നത്.
സാക്ഷി എന്ന മൂകയായ ചിത്രകാരിയായാണ് അനുഷ്‌കയെത്തുന്നത്.ഒരു പ്രേതഭവനത്തെ ചുറ്റിപറ്റിയാണ് ചിത്രത്തിന്റെ കഥ വികസിക്കുന്നത്. ഹോളിവുഡ് ചിത്രങ്ങളായ കില്‍ ബില്‍, സ്പീഷ്യസ് തുടങ്ങിയ ചിത്രങ്ങളിലെ നടന്‍ മൈക്കല്‍ മാഡ്സണും ചിത്രത്തില്‍ പ്രധാനവേഷത്തിലെത്തുന്നുണ്ട്.
