[] ഇഞ്ചിയോണ്‍: ഏഷ്യന്‍ ഗെയിംസില്‍ ഇന്ത്യക്ക് വീണ്ടും വെങ്കലം. വനിതാ വിഭാഗം ജാവലിന്‍ ത്രോയില്‍ അനുറാണിയാണ് ഇന്ത്യക്ക് വേണ്ടി വെങ്കലം സ്വന്തമാക്കിയത്. 59.53 മീറ്റര്‍ ദൂരം കീഴടക്കിയാണ് അനുറാണിയുടെ മെഡല്‍ നേട്ടം.

65.47 മീറ്റര്‍ ദൂരം മറികടന്ന് റെക്കോഡ് നേടിയ ചൈനയുടെ ലി ഷാങ്ങിനാണ് സ്വര്‍ണം. ചൈനയുടെ തന്നെ ലിങ് വി ലീക്കാണ് ഈ ഇനത്തില്‍ വെള്ളി നേടിയത്. 61.43 മീറ്റര്‍ ദൂരമാണ് ലിങ് വിയുടെ നേട്ടം.

അതേസമയം ഏഷ്യന്‍ ഗെയിംസ് 800 മീറ്റര്‍ പുരുഷ വിഭാഗം ഫൈനലില്‍ മൂന്നു താരങ്ങളെ അയോഗ്യരാക്കിയതോടെ മലയാളി താരം സജീഷ് ജോസഫിന്റെ സ്ഥാനം നാലാമതായി ഉയര്‍ന്നു. ഏഴാമതായാണ് സജീഷ് ഫിനിഷ് ചെയ്തത്.

ഫൗള്‍ സ്റ്റാര്‍ട്ടിംഗ് മൂലമാണ് സൗദിഅറേബ്യയുടെ ലാദന്‍ അബ്ദുള്‍അസീസ് മുഹമ്മദ്, ബഹ്റൈന്‍ താരം അബ്രഹാം റോത്തിച്ച്, ഖത്തറിന്റെ മുസാബ് ബാലാ എന്നിവരെ അയോഗ്യരാക്കിയത്.