ബെംഗളൂരു: ജാതീയതക്കും ബ്രാഹ്മണിസത്തിനുമെതിരായ ട്വീറ്റുകളുടെ പേരില്‍ കന്നട നടനും ആക്ടിവിസ്റ്റുമായ ചേതന്‍ അഹിംസക്കെതിരെ മറ്റൊരു കേസ് കൂടി രജിസ്റ്റര്‍ ചെയ്ത് പൊലീസ്.
ചേതന്റെ ട്വീറ്റ് ബ്രാഹ്മണ സമുദായത്തെ അപമാനിക്കുന്നു എന്ന് ചൂണ്ടിക്കാട്ടി കര്‍ണാടക ബ്രാഹ്മണ ബോര്‍ഡ് ചെയര്‍മാന്‍ എച്ച്.എസ്. സച്ചിദാനന്ദ മൂര്‍ത്തിയാണ് പുതിയ പരാതി നല്‍കിയത്. അള്‍സൂര്‍ പൊലീസാണ് പുതിയ പരാതിയില്‍ കേസെടുത്തിട്ടുള്ളത്.
ജൂണ്‍ ആറിന് അംബേദ്കറുടെയും പെരിയാര്‍ ഇ.വി. രാമസ്വാമിയുടെയും വാക്കുകള്‍ ട്വീറ്റ് ചെയ്ത ചേതന്‍ പിന്നീട് ജാതീയതക്കും ബ്രാഹ്മണിസത്തിനുമെതിരെ തുടര്‍ച്ചയായ ട്വീറ്റുകളുമായി രംഗത്തുവരികയായിരുന്നു. താന്‍ ബ്രാഹ്മണര്‍ക്കെതിരല്ലെന്നും ബ്രാഹ്മണിസം തീര്‍ക്കുന്ന ജാതീയതക്കെതിരാണെന്നുമായിരുന്നു ചേതന്റെ പ്രതികരണം.
നേരത്തെ വിപ്ര യുവ വേദികെ ഭാരവാഹി പവന്‍ കുമാര്‍ ശര്‍മയുടെ പരാതിയിലും ഇതേട്വീറ്റിന്റെ പേരില്‍ ബെംഗളൂരു ബസവനഗുഡി പൊലീസ് കേസെടുത്തിരുന്നു. ഇരു പരാതിയിലും ഐ.പി.സി 153 ബി, 275 എ എന്നീ വകുപ്പുകള്‍ പ്രകാരമാണ് കേസെടുത്തത്. മുന്ന് മുതല്‍ അഞ്ച് വര്‍ഷം വരെ ജാമ്യമില്ലാതെ തടവ് ലഭിക്കാവുന്ന വകുപ്പുകളാണിവ.
അതേസമയം, ഭാഷ വിവേചനത്തിനെതിരെ നടക്കുന്ന ചര്‍ച്ചക്ക് തുടക്കമിട്ട് മറ്റൊരു ട്വീറ്റുമായി ചേതന്‍ രംഗത്തെത്തി. എട്ടാം ഷെഡ്യൂള്‍ പ്രകാരമുള്ള 22 ഭാഷകളും കേന്ദ്ര സര്‍ക്കാരിന്റെ ഔദ്യോഗിക ഭാഷയായി പ്രഖ്യാപിക്കണമെന്ന ആവശ്യം ഉന്നയിച്ചായിരുന്നു പുതിയ ട്വീറ്റ്. ദേശീയ ഭാഷ എന്നൊന്നില്ല എന്ന് പറഞ്ഞാണ് ചേതന്‍ ട്വീറ്റ് ചെയ്തത്.
കര്‍ണാടകയിലെ കോര്‍പ്പറേറ്റ് പാര്‍ട്ടികളെക്കാളും പെരിയാറില്‍ നിന്ന് പ്രചോദനമുള്‍ക്കൊണ്ട് തമിഴ് നാട്ടിലെ പാര്‍ട്ടിയായ ഡി.എം.കെയാണ് കന്നട ഭാഷക്കായി പോരാടുന്നതെന്ന് ചേതന്‍ ട്വീറ്റില്‍ പറഞ്ഞു.
ബസവേശ്വരന്റെയും ബുദ്ധന്റെയും ആശയങ്ങളെ ബ്രാഹ്മണിസം കൊന്നുകളഞ്ഞെന്നും ബ്രാഹ്മണിസത്തിനെതിരെ ബുദ്ധന്‍ പോരാടിയിരുന്നതായും ഒരു വീഡിയോ സന്ദേശത്തില്‍ ചേതന്‍ നേരത്തെ പറഞ്ഞിരുന്നു.
ഇതിനുപിന്നാലെ ചേതന്റെ പ്രസ്താവന ഭരണഘടനാവിരുദ്ധമാണെന്നും അദ്ദേഹത്തെ അറസ്റ്റ് ചെയ്യണമെന്നും ആവശ്യപ്പെട്ട് തൊഴില്‍ മന്ത്രി ശിവറാം ഹെബ്ബാര്‍ കഴിഞ്ഞദിവസം രംഗത്തെത്തുകയും ചെയ്തിരുന്നു.
2007 മുതല്‍ കന്നഡ സിനിമയില്‍ ശ്രദ്ധേയമായ റോളുകള്‍ ചെയ്തിട്ടുള്ള നടനാണ് ചേതന്‍. 12 ലേറെ സിനിമകളില്‍ താരം അഭിനയിച്ചിട്ടുണ്ട്.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം
CONTENT HIGHLIGHTS: Another case has been registered against Kannada actor and activist Chetan Ahimsa for his anti-caste and anti-Brahmin tweets.