കഥ കേട്ടതിന് ശേഷം തീരുമാനം; കാപ്പ 2 സ്വീകരിക്കുമോ എന്ന ചോദ്യത്തോട് അന്ന ബെന്‍
എന്റര്‍ടെയിന്‍മെന്റ് ഡെസ്‌ക്
Thursday, 25th May 2023, 2:18 pm
ഏറെ പ്രതീക്ഷകളുമായി തിയേറ്ററുകളില്‍ എത്തിയ ചിത്രമാണ് പൃഥ്വിരാജ് നായകനായ കാപ്പ. ഷാജി കൈലാസ് സംവിധാനം ചെയ്ത ചിത്രത്തില്‍ അപര്‍ണ ബാലമുരളി, അന്ന ബെന്‍, ആസിഫ് അലി എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിച്ചത്. ജി.ആര്‍. ഇന്ദുഗോപനാണ് ചിത്രത്തിന്റെ തിരക്കഥ തയാറാക്കിയത്.
സമ്മിശ്ര പ്രതികരണം നേടിയ ചിത്രം ഒ.ടി.ടിയില്‍ ഇറങ്ങിയപ്പോള്‍ അപര്‍ണയും അന്ന ബെന്നും അവതരിപ്പിച്ച കഥാപാത്രങ്ങളായ പ്രമീളയും ബിനുവും ഒരുപാട് ട്രോളുകള്‍ നേരിട്ടിരുന്നു. ചിത്രത്തിന്റെ രണ്ടാം ഭാഗവുമായി ഇന്ദുഗോപന്‍ വന്നാല്‍ സ്വീകരിക്കുമോ എന്ന ചോദ്യത്തിന് മറുപടി നല്‍കുകയാണ് അന്ന ബെന്‍.
കഥ കേട്ടതിന് ശേഷം തീരുമാനമെടുക്കുമെന്നും ഒന്നാം ഭാഗത്തിലുണ്ടായിരുന്നതിനാല്‍ ചിത്രത്തെ പരിഗണിക്കുമെന്നും പോപ്പര്‍ സ്റ്റോപ്പ് മീഡിയക്ക് നല്‍കിയ അഭിമുഖത്തില്‍ അന്ന പറഞ്ഞു.
