ന്യൂദല്‍ഹി: ഹിന്ദി ഇന്ത്യയുടെ പ്രഥമ ഭാഷയാക്കണമെന്ന ആഭ്യന്തരമന്ത്രി അമിത് ഷായുടെ പ്രസ്താവനയ്ക്കെതിരെ ഇന്ത്യന്‍ ഇംഗ്ലീഷ് എഴുത്തുകാരി അനിതാ നായര്‍. തീര്‍ച്ചയായും ഇത് തേങ്ങാക്കൊല തന്നെ…ഹിന്ദി ഇമ്പോസിഷനെക്കുറിച്ച് കേരളത്തില്‍ നിന്നുള്ള പരിഹാസം എന്നായിരുന്നു അനിതാ നായരുടെ ട്വീറ്റ്. ഹിന്ദി വാദത്തെ പരിഹസിച്ച് സാമൂഹ്യമാധ്യമങ്ങളില്‍ പ്രചരിക്കുന്ന ട്രോളാണ് അനിതാ നായര്‍ ട്വീറ്റ് ചെയ്തത്.
തെങ്ങിന്റേയും തേങ്ങയുടേയും വിവിധ ഉപയോഗങ്ങള്‍ വിശദീകരിക്കുന്നതാണ് അതിനോടൊപ്പം ട്വീറ്റ് ചെയ്ത വീഡിയോ. അതില്‍ ഹിന്ദിയിലും മലയാളത്തിലും കൊടുത്ത വിവരണങ്ങളും ഉണ്ട്.
ഹിന്ദി അടിച്ചേല്‍പ്പിക്കാനാണ് ശ്രമമെങ്കില്‍ ജല്ലിക്കട്ട് പ്രക്ഷോഭത്തേക്കാള്‍ വലിയ പ്രക്ഷോഭം കാണേണ്ടി വരുമെന്നായിരുന്നു നടന്‍ കമല്‍ഹാസന്റെ പ്രതികരണം. ഒരു രാജ്യം, ഒരു ഭാഷ എന്ന നിര്‍ദേശം തികച്ചും ഏകാധിപത്യപരമാണെന്ന് എം.ടി വാസുദേവന്‍ നായര്‍ വ്യക്തമാക്കി.
ഹിന്ദി ഇന്ത്യയുടെ പ്രാഥമിക ഭാഷയാക്കണമെന്നും ഒരു ഭാഷയ്ക്ക് ഇന്ന് ഇന്ത്യയെ ഒന്നിപ്പിക്കാന്‍ കഴിയുമെങ്കില്‍ അത് വ്യാപകമായി സംസാരിക്കുന്ന ഹിന്ദിയാണെന്നുമായിരുന്നു അമിത് ഷായുടെ പരാമര്‍ശം.
