ഒരു സ്‌കൂളില്‍ ഒരു കുട്ടി മാത്രം പഠിക്കുന്നു. നമ്മുടെ സംസ്ഥാനമായ കേരളത്തില്‍ തന്നെയാണിത്. കഴിഞ്ഞ രണ്ട് വര്‍ഷമായി ആ കുട്ടി മാത്രമാണ് സ്‌കൂളില്‍ പഠിക്കുന്നത്. പാലക്കാട് ജില്ലയിലെ ഷൊര്‍ണൂര്‍ ചുഡുവാലത്തൂരിലാണ് ഈ സ്‌കൂള്‍. എസ്ആര്‍വി എല്‍.പി സ്‌കൂള്‍ എന്ന സ്‌കൂളില്‍ ഇപ്പോള്‍ നാലാം ക്ലാസ്സില്‍ പഠിക്കുന്ന അനേലയാണ് ഏകവിദ്യാര്‍ത്ഥി.
റഷീദ ടീച്ചറാണ് അനേലയെ പഠിപ്പിക്കുന്നത്. കഴിഞ്ഞ രണ്ട് വര്‍ഷമായി റഷീദ ടീച്ചര്‍ മാത്രമാണ് അനേലയ്ക്ക് കൂട്ട്. നേരത്തെ നാല് വരെയുള്ള ക്ലാസ്സുകളില്‍ മൂന്നോളം ഡിവിഷന്‍ വരെ ഉണ്ടായിരുന്ന സ്‌കൂള്‍ ആണിത്. 2010 തൊട്ടാണ് വിദ്യാര്‍ത്ഥികള്‍ കുറഞ്ഞ് തുടങ്ങിയത്. കുട്ടികള്‍ കുറഞ്ഞ് തസ്തികകള്‍ ഇല്ലാതായതോടെ ബിആര്‍സിയിലേക്ക് പോയ അധ്യാപിക റഷീദ അധ്യാപികമാര്‍ വിരമിച്ച ഒഴിവിലാണ് മൂന്നു വര്‍ഷം മുമ്പ് മടങ്ങി വന്നത്.
ആ വര്‍ഷം രണ്ട് കുട്ടികളാണ് ഒന്നാം ക്ലാസ്സിലുണ്ടായിരുന്നത്. അനേല രണ്ടിലേക്ക് ജയിച്ചതോടെ ഒറ്റക്കായി. അനേല അടുത്ത വര്‍ഷം അഞ്ചിലേക്ക് ജയിക്കുന്നതോടെ പുതിയ സ്‌കൂളിലേക്ക് മാറും. അതോടെ ചുഡുവാലത്തൂര്‍ കുട്ടികളില്ലാതെ അടച്ചുപൂട്ടൂന്ന സ്‌കൂള്‍ എന്ന പട്ടികയിലേക്ക് മാറും.
ചിത്രത്തിന് കടപ്പാട്: മനോരമ