മുസ്‌ലിം യുവാവിനെ കള്ളക്കേസില്‍ കുടുക്കാന്‍ കടയില്‍ തോക്ക് കൊണ്ടുവെച്ച് യു.പി പൊലീസ്; ദൃശ്യങ്ങള്‍ പുറത്ത്
ഡൂള്‍ന്യൂസ് ഡെസ്‌ക്
Monday, 14th June 2021, 9:07 am
ലഖ്‌നൗ: ഉത്തര്‍പ്രദേശില്‍ മുസ്‌ലിം യുവാവിനെ കള്ളക്കേസില്‍ കുടുക്കാന്‍ കടയില്‍ പൊലീസ് തന്നെ തോക്ക് കൊണ്ടുവെക്കുന്നതിന്റെ ദൃശ്യങ്ങള്‍ പുറത്ത്. അമേഠി ജില്ലയിലെ ബാദല്‍ ഗഡ് ഗ്രാമത്തിലെ ഗുല്‍സാര്‍ അഹമ്മദിന്റെ ഹാര്‍ഡ് വെയര്‍ കടയിലാണ് സംഭവം.
യുവാവിന്റെ ഷോപ്പില്‍ പൊലീസ് തന്നെ തോക്ക് കൊണ്ടുവെച്ച് കള്ളക്കേസില്‍ കുടുക്കാനായിരുന്നു ശ്രമം. എന്നാല്‍ ഷോപ്പിലെ സി.സി.ടി.വി ദൃശ്യങ്ങള്‍ പുറത്തുവന്നതോടെ പൊലീസിന്റെ ശ്രമം പാളി.
പൊലീസുകാര്‍ കടയില്‍ തോക്ക് കൊണ്ടുപോയി വെച്ച ശേഷം കടയുടമയെ പിടികൂടാന്‍ ശ്രമിക്കുന്നത് ദൃശ്യങ്ങളില്‍ വ്യക്തമാണ്. മാര്‍ച്ച് 16ന് രാത്രി എട്ടുമണിയോടെയാണ് സംഭവം നടന്നത്.
കടയില്‍ തോക്ക് കൊണ്ടുവന്ന് വച്ച ശേഷം താന്‍ നിയമവിരുദ്ധ പ്രവര്‍ത്തനങ്ങളില്‍ ഏര്‍പ്പെടുന്നുവെന്നായിരുന്നു പൊലീസുകാര്‍ പറഞ്ഞതെന്ന് അഹമ്മദ് പറയുന്നു.
