തമിഴിൽ ഇറങ്ങി ഇന്ത്യയൊട്ടാകെ ശ്രദ്ധ നേടിയ ക്രൈം ത്രില്ലർ ചിത്രമായിരുന്നു രാക്ഷസൻ.
റാം കുമാർ സംവിധാനം ചെയ്ത ചിത്രത്തിൽ വിഷ്ണു വിശാൽ ആയിരുന്നു പ്രധാന കഥാപാത്രമായി എത്തിയത്. ത്രില്ലർ സിനിമകളിൽ ഏറെ മുന്നിൽ നിൽക്കുന്ന ചിത്രമാണ് രാക്ഷസൻ. ചിത്രം ഹിന്ദിയിലേക്കും റീമേക്ക് ചെയ്തിരുന്നു.
നടി അമല പോളയിരുന്നു ചിത്രത്തിൽ നായികയായി എത്തിയത്. രാക്ഷസന്റെ കഥ ആദ്യമായി കേട്ടപ്പോൾ തനിക്ക് വർക്ക് ആയില്ലെന്നും ഒട്ടും താത്പര്യം ഇല്ലാത്ത പോലെയാണ് സംവിധായകൻ തന്നോട് കഥ പറഞ്ഞതെന്നും അമല പറയുന്നു.
എന്നാൽ സംവിധായകന്റെ രീതി അങ്ങനെയാണെന്ന് നടൻ വിഷ്ണു വിശാൽ പറഞ്ഞെന്നും വിഷ്ണുവാണ് പിന്നീട് കഥ പറഞ്ഞ് തന്നെ കൺവിൻസ് ചെയ്തതെന്നും അമല പറഞ്ഞു. മൂവി വേൾഡ് മീഡിയയോട് സംസാരിക്കുകയായിരുന്നു താരം.
‘രാക്ഷസന്റെ സംവിധായകൻ ചിത്രത്തിന്റെ സ്ക്രിപ്റ്റ് പറഞ്ഞപ്പോൾ എനിക്കത് ഒട്ടും വർക്ക് ആയില്ല. എനിക്ക് തോന്നിയത് പുള്ളിക്ക് എന്തോ പറയാൻ താത്പര്യം ഇല്ലായെന്നാണ്. കാരണം അങ്ങനെയാണ് പറയുന്നത്. എന്ന് കരുതി ആ പടം ഞാൻ വിട്ടിരുന്നെങ്കിലോ.
വിഷ്ണു വിശാലാണ് എന്നെ കൺവിൻസ് ചെയ്തത്. വിഷ്ണു പറഞ്ഞു, സംവിധായകൻ റാം അങ്ങനെ തന്നെയാണ്. നല്ല ഷൈയാണ്, ഇൻട്രോവേർട്ടഡാണ് പക്ഷെ നീ എന്നെ വിശ്വസിക്കണമെന്ന്. സത്യത്തിൽ വിഷ്ണുവാണ് എനിക്ക് കഥ പറഞ്ഞ് തന്നത്.
പക്ഷെ അത് ഏത്‌ രീതിയിലാണ് സിനിമയായി മാറിയത്. അത് ഒഴിവാക്കിയിരുന്നെങ്കിൽ ഏറ്റവും വലിയ മിസ്‌ ആയേനെ. ആ ഒരു കഥാപാത്രത്തെ ഇന്നും പ്രേക്ഷകർ ഓർക്കുന്നുണ്ട്. കഴിഞ്ഞ ദിവസം ഒരു കോളേജിൽ പോയപ്പോൾ ഒരു അവിടുത്തെ ഒരു കുട്ടിയും പറഞ്ഞു, ചേച്ചി രാക്ഷസൻ ഒരു രക്ഷയുമില്ല, ഞാൻ പേടിച്ചുപ്പോയെന്ന്,’അമല പോൾ പറയുന്നു.
Content Highlight: Amala Paul About Rakshasan Movie