ഫലസ്തീന് ഐക്യദാര്‍ഢ്യം; ഇസ്രാഈലി താരത്തിനെതിരായ മത്സരത്തില്‍ നിന്ന് പിന്‍മാറിയ അള്‍ജീരിയന്‍ ജൂഡോ താരത്തിന് 10 വര്‍ഷം വിലക്ക്
സ്പോര്‍ട്സ് ഡെസ്‌ക്
Saturday, 11th September 2021, 10:20 am
ടോക്കിയോ: ഫലസ്തീന് ഐക്യദാര്‍ഢ്യം പ്രഖ്യാപിച്ച് ഇസ്രാഈലി താരത്തിനെതിരായ ഒളിംപിക്‌സ് മത്സരത്തില്‍ നിന്ന് പിന്‍മാറിയ അള്‍ജീരിയന്‍ ജൂഡോ താരം ഫെതി നൗറിന് 10 വര്‍ഷം വിലക്ക്. അന്താരാഷ്ട്ര ജൂഡോ ഫെഡറേഷനാണ് (ഐ.ജെ.എഫ്) ഫെതിയെ വിലക്കിയത്.
ഫെതിയുടെ പരിശീലകന്‍ അമര്‍ ബെനികേല്‍ഫിനും വിലക്കുണ്ട്. ഇത് പ്രകാരം ജുഡോയുടെ ഒരു മത്സരയിനത്തിലും ഇരുവര്‍ക്കും പങ്കെടുക്കാനാകില്ല.
ഫെതി അന്താരാഷ്ട്ര കായിക വേദിയെ രാഷ്ട്രീയ അജണ്ടയ്ക്ക് ഉപയോഗിച്ചുവെന്നാണ് ഐ.ജെ.എഫ് പറയുന്നത്. ഇത് അച്ചടക്കലംഘനമാണെന്നാണ് ഐ.ജെ.എഫ് കണ്ടെത്തല്‍.
ടോക്കിയോ ഒളിംപിക്‌സില്‍ ഇസ്രാഈലുമായുള്ള മത്സരം വരാനുള്ള സാധ്യത കണക്കിലെടുത്താണ് ഫെതി പിന്‍മാറിയത്.
