ലക്ഷ്മി ദേവിയെ അവഹേളിക്കുന്നെന്ന് അക്ഷയ് കുമാറിന് കര്‍ണിസേനയുടെ വക്കീല്‍ നോട്ടീസ്; ഒടുവില്‍ പേര് മാറ്റി 'ലക്ഷ്മി ബോംബ്' ടീം
എന്റര്‍ടെയിന്‍മെന്റ് ഡെസ്‌ക്
Thursday, 29th October 2020, 8:06 pm
മുംബൈ: ലക്ഷ്മി ദേവിയെ അപമാനിക്കുന്നതാണ് അക്ഷയ് കുമാറിന്റെ പുതിയ സിനിമയായ ലക്ഷ്മി ബോംബ് എന്ന പരാതിക്ക് പിന്നാലെ ചിത്രത്തിന്റെ പേര് മാറ്റി അണിയറ പ്രവര്‍ത്തകര്‍.
ലക്ഷ്മിയെന്നാണ് ചിത്രത്തിന്റെ പുതിയ പേര്. ചിത്രം അടുത്ത മാസം ഹോട്ട്സ്റ്റാറിലൂടെ റിലീസ് ചെയ്യാനിരിക്കുകയാണ്. ചിത്രത്തിന്റെ ആദ്യ പേര് ലക്ഷ്മീദേവിയെ അവഹേളിക്കുന്നതും അപകീര്‍ത്തിപ്പെടുത്തുന്നതുമാണ് എന്ന് കാണിച്ചായിരുന്നു കര്‍ണിസേനയുടെ പരാതി.
തുടര്‍ന്ന് അഭിഭാഷകനായ രാഘവേന്ദ്ര മെഹ്റോത്ര മുഖേന അക്ഷയ്കുമാര്‍ അടക്കമുള്ളവര്‍ക്ക് നോട്ടീസ് അയക്കുകയായിരുന്നു. ഹിന്ദു സംസ്‌കാരത്തിന്റെ പ്രത്യയശാസ്ത്രം, ആചാരങ്ങള്‍, ദേവന്മാര്‍, ദേവതകള്‍ എന്നിവരെ കുറിച്ച് സമൂഹത്തിന് തെറ്റായ സന്ദേശമാണ് തലക്കെട്ട് നല്‍കുന്നതെന്നും കര്‍ണി സേന പറഞ്ഞു.
